Home / Press Releases / Selebrashon 85 aña KLM bulando Kòrsou

WILLEMSTAD – 22 di desèmber 2019 – 22 di desèmber 2019 ta e fecha riba kual ta konmemorá ku 85 aña pasá KLM a kuminsá bula e ruta Hulanda – Kòrsou. Ofisina di Turismo di Kòrsou (CTB) i Curaçao Airport Partners (CAP) ta felisitá e kompania i na mes momentu ta gradisí nan pa e echo importante aki. Resientemente e kompania a selebrá 100 aña di eksistensia i awor ta selebrando 85 aña bulando Kòrsou sin interupshon. Motibu sigur pa selebrá.

Riba 22 di desèmber 2019 a selebrá e logro importante aki na Aeropuerto Internashonal Hato na yegada di un di e avionnan di KLM. Durante e seremonia, Minister di Desaroyo Ekonómiko sra. Giselle Mc William i Minister di Tráfiko, Transporte i Planifikashon Urbano sra. Zita Jesus-Leito a dirigí nan mes na e representantenan di KLM aki na Kòrsou, e kapitan, crew i demas partnernan den industria di turismo. Di akuerdo ku Minister Mc William “Airlift ta importante pa kresementu di nos sektor di turismo. KLM ta sigur un partner ku ta kontribuí grandemente na esaki ehekutando buelonan diario entre Hulanda i nos pais. Danki pa boso konfiansa i nos ta spera di por sigui konta pa hopi aña mas ku un partner importante manera KLM”. Minister Jesus-Leito a indiká “Mi ta orguyoso di e 85 aña di konekshon kontinuo entre Kòrsou ku Hulanda pa medio di KLM. Danki na nan servisio kontinuo, Kòrsou tin un konekshon direkto ku Europa. Turistanan rònt Europa por bishitá nos dushi isla i nos mes hendenan por bini kas bèk tur dia den ménos ku 10 ora”. Durante di e seremonia a entregá KLM den persona di sra. Tsamira Pietersz Marketing & Communications Coordinator i sr. Reginald Beverdijk Station Manager Curaçao un plakat konmemorativo i a entregá e kapitan  i e crew un rekuerdo di Kòrsou. 

Na Hulanda tambe a para ketu na 85 aña di KLM bulando Kòrsou. Minister Plenipotensiario sr. Anthony Begina a hasi entrega di un plakat konmemorativo na e direktor di KLM Hulanda sr. Harm Kreulen. Gobièrnu di Kòrsou, Ofisina di Turismo di Kòrsou (CTB) i Curaçao Airport Partners ta felisitá KLM i ta deseá nan hopi 85 aña mas bulando e destinashon úniko den Karibe kual ta nos pais Kòrsou!

CTB honors 12 of Curaçao’s Luminaries
Celebrating 85 Years of KLM Flights to Curaçao