Entrega di sertifikado Kurso di Servisio na Kliente i Kurso di Seguridat den Turismo

July 11, 2019

WILLEMSTAD – 4 di yüli 2019 – Durante di e periodo tras di lomba Ofisina di Turismo di Kòrsou (CTB) a kondusí 2 kurso dirigí riba sektor di turismo. Ta trata aki di un kurso di Servisio na Kliente i un kurso di Seguridat den turismo. Durante un seremonia ameno kual a tuma lugá na e aria di rekreashon na Marie Pampoen, un total di 164 persona a risibí nan sertifikado despues di a terminá ku éksito un di e kursonan ariba menshoná. E seremonia a inkluí spich di Minister enkargá ku Desaroyo Ekonómiko sr. Kenneth Gijsbertha, CEO di CTB sr. Paul Pennicook i Hefe di Departamentu di Desaroyo di Produkto sr. Ritzel Godfried.

E kurso di Servisio na Kliente, diseñá pa Teamwork Curaçao, a konsistí di e siguiente modulonan: : Servisio na bo òrdu!, Komunikashon efektivo, Kon pa atendé den situashonnan difísil i Bai e ‘extra mile’. E partisipantenan ta di e siguiente organisashonnan: Kuerpo Polisial Kòrsou, Departamentu di Imigrashon, Curaçao Ports Authority, Duana i Curaçao Airport Partners. Un total di 97 persona a terminá e kurso ku éksito.

Pa loke ta trata e kurso di Seguridat, esaki a keda ofresé na personanan ku riba base diario ta den kontakto ku e turista. Pa e partisipantenan e kurso aki a ofresé un tremendo oportunidat pa nan sigui desaroyá nan abilidatnan i siña kon pa atendé aspektonan di seguridat. Dr. Peter Tarlow, eksperto renombrá internashonalmente riba aria di seguridat a guia e kurso. Sr. Tarlow den pasado ya a yega di traha ku CTB. E aña aki un total di 67 persona a kompletá e kurso. E partisipantenan ta di e siguiente organisashonnan: Avila Beach Hotel, Renaissance Curaçao Resort & Casino, Sunscape Curaçao Resort Spa & Casino, Papagayo Curaçao, Santa Barbara Beach & Golf Resort Curaçao, Curaçao Ports Authority, Stichting Slachtofferhulp Curaçao, Fundashon Kuido di Ambulans Kòrsou, Kuerpo Polisial Kòrsou, Budget Rent-a-Car Curaçao, Hertz Car Rental, Sinusta Taxi Curaçao, Thirty Steps Association, Konsulado di Estádos

Unídos i di Sürnam, CHATA i CTB.

CTB ta gradisí tur partisipante pa nan partisipashon aktivo na e seshonnan i ta konta ku nan lo bai hasi bon uso di e konosementu atkerí den nan trabou diario.

Most recent