Ofisina di Turismo di Kòrsou ta lansa curacao.com den un bachi nobo

May 6, 2019

WILLEMSTAD – 25 di aprel 2019 – Mirando e ròl kresiente di turismo i e branding nobo ku a keda lansá resientemente pa Kòrsou, ‘Feel It For Yourself’ esta ‘Sintié pa Bo Mes’, a yega e momentu pa un wèpsait nobo. Ofisina di Turismo di Kòrsou (CTB) a traha riba un wèpsait nobo kual awor a keda lansá. E wèpsait nobo ta konsistí di kolónan vibrante i imágennan espektakular di nos pais tantu den forma di potrèt komo video ku sigur lo lanta kuriosidat serka tur potensial biahero pa nan bin eksperensiá nos pais. CTB pa medio di e wèpsait nobo ta ofresé e biahero un plataforma fásil ku ta yud’e krea un eksperensia memorabel tantu promé, durante komo despues di su vakashon riba nos pais. Na mes momentu e wèpsait nobo mester sirbi tambe pa brinda informashon na tantu stakeholders pafó komo esnan aki na Kòrsou.

Curacao.com ta un di e hèrmèntnan importante ku ta forma parti di e merkadeo digital ku ta keda hasí pa atraé mas bishitante pa nos pais. E wèpsait nobo ta tene kuenta ku e biahero di awendia ta buska rekursonan ku por yud’e organisá i plania su biahe. Hasiendo uso di e curacao.com nobo e usuario tin e oportunidat pa por ehèmpel e mes krea un itinerario i pa asina despues e bishitá i eksperensiá diferente atrakshon turístiko riba nos pais. Otro komponente ku tambe ta inkluí den e wèpsait nobo ta eksperensianan outéntiko di esnan ku ya a yega di bishitá nos pais.

E wèpsait nobo ta na 6 idioma. Awor Franses a keda inkluí na e idiomanan ku tabatin den e wèpsait anterior esta, Ingles, Hulandes, Spañó, Portugues i Aleman. Di e manera aki, CTB kier brinda bishitantenan den e merkadonan mas grandi tur informashon di Kòrsou den nan mes idioma. Invitá spesialmente bo konosínan den eksterior ku ainda no a bishitá nos pais pa nan tambe bishitá curacao.com i sa mas di nos dushi pais Kòrsou.

Most recent