Kòrsou a ‘pinta’ siudat di New York blou durante Color Run 2018

October 19, 2018

WILLEMSTAD – 18 di òktober 2018 – Resientemente Kòrsou, komo destinashon, a partisipá na e Color Run di New York. E Color Run tambe konosí komo e 5 kilometernan di mas alegre riba planeta ta un kareda kaminda ta selebrá individualismo i tambe e echo ku bo ta bon di salú i alegre. Ta trata di e Color Run di mas grandi na mundu kaminda mas di 6 mion persona a yega di partisipá den mas ku 35 pais. Ofisina di Turismo di Kòrsou (CTB) komo un di e patronisadónan di e ‘New York 5K Color Run 2018’ a hasi uso di e oportunidat pa ekshibí nos destinashon komo esun mas kolorido na mundu, meskos ku a hasi na luna di mei último na Fort Lauderdale. Durante e Color Run, CTB a kompartí informashon di Kòrsou ku e partisipantenan i a suprayá e buelo nònstòp ku JetBlue pa Kòrsou for di aeropuerto internashonal JFK.

Por bisa ku 75% di e partisipantenan na e New York Color Run ta millennials, ku ta personanan entre 18 pa 35 aña di edat kual ta kai den CTB su grupo di enfoke. E kareda a kuminsá parti paden di Citi Field, kas di New York Mets, pasa dor di e stadion i rònt di e vèlt di beisbòl. Despues e partisipantenan a keda guiá na 4 zona di koló, inkluyendo e zona blou patrosiná dor di Kòrsou. E logo di Kòrsou tabata prominentemente visibel i pa kompletá e eksperensia tabatin dushi músika di nos artistanan lokal.

Adishonalmente, CTB a invitá periodistanan na New York ku enfoke riba biahe, estilo di bida i komersio pa kore e 5 km kompañá pa un representante di Kòrsou. E medionan ku a partisipá a inkluí New York Times, Condé Nast Traveler, Food & Wine, Travel + Leisure, Sherman’s Travel, Hip Latina i The Cook’s Cook.

E stènt di Kòrsou na e Finish Festival, e after-party ofisial di Color Run a keda asentuá ku un banner mahestuoso di nos Handelskade. E aria kaminda e stènt di Kòrsou tabata ubiká a inkluí un bar estilo di Kòrsou kaminda partisipantenan por a pasa tuma un brel di solo di Kòrsou i tambe saka potrèt. CTB i Hilton Curaçao a uni pa ofresé un biahe pa dos persona pa Kòrsou kortesia di JetBlue Vacations i un estadia di 4 anochi na Hilton Curaçao. Gianina Atalita di CTB i Lynette Dmuchowski representante di Hilton Curaçao na New York a djòin e DJ riba esenario i dilanti un públiko di mas ku 5.700 fanátiko a anunsiá e 2 ganadónan.

CTB por mira bèk riba otro inisiativa ku a resultá den un promoshon eksitoso pa Kòrsou.

Most recent