CTB i su partnernan lo ta anfitrion di e promé Konferensia Nashonal di Turismo

August 22, 2018

WILLEMSTAD- 21 di ougùstùs 2018 – Dia 26 i 27 di sèptèmber 2018, Ofisina di Turismo di Kòrsou (CTB) den kolaborashon ku Ministerio di Desaroyo Ekonómiko (MEO), Curaçao Hospitality and Tourism Association (CHATA), Curaçao Ports Authority (CPA) i Bureau Telecommunicatie & Post (BTP) lo ta anfitrion di e promé Konferensia Nashonal di Turismo (NTC2018). NTC2018 lo konsistí di seshonnan plenario, seshonnan ku ta tuma lugá na mesun momentu tratando kada unu un otro tópiko di interes i presentashonnan ku lo tuma lugá durante lùnch.

E meta di e NTC2018 ta pa konsolidá Kòrsou su plannan pa kresementu sostenibel den turismo ku lo mester kondusí na un transformashon berdadero den henter e sektor i ku ta trese benefisio ekonómiko pa gran parti di nos pueblo. Ademas, e konferensia lo ta un oportunidat pa huntu evaluá progreso di Tourism Master Plan a base di e ophetivonan fihá, i palabrá ki rumbo lo sigui den futuro pa yega na mas desaroyo sostenibel. Na e konferensia lo tin oradó lokal i internashonal ku lo presentá e mihó práktika- i strategianan riba tereno di merkadeo i desaroyo di produkto ku ta esensial pa kresementu di industria di turismo na Kòrsou. Durante e konferensia di prensa, minister di Desaroyo Ekonómiko, Dr. Steven Martina a splika kiko ta e motivashon tras di e promé Konferensia Nashonal di Turismo, i CTB na su turno a duna mas detaye tokante e tópikonan, programa i oradónan di e konferensia. CHATA, MEO, BTP i CPA na nan turno a elaborá riba kada un su ròl i riba nan aporte na e promé NTC2018.

Tema di NTC2018 ta: Trahando na kresementu sostenibel di turismo mediante transformashon inovativo. Na e konferensia, e partisipantenan lo risibí informashon riba tendensianan aktual ku ta hunga un papel importante den turismo, ideanan inovativo i strategianan, tur ku e meta pa logra desaroyo sostenibel di nos turismo. Éksito di e konferensia lo ta basá riba kolaborashon entre sektor públiko i privá.

Algun di e tópikonan ku lo keda tratá dia 26 i 27 di sèptèmber ta: Finansiamentu di Turismo, Futuro di Sostenibilidat Urbano i e konsepto di ‘Smart Cities’, Siguridat di Públiko, Transporte riba Tera, Legislashon riba Tereno di Turismo na Kòrsou, ‘Back to the Future’: E Generashon Nobo di Biahe Krusero, Norma di Kalidat den Turismo, Merkadeo Digital i mas.

Ken lo benefisiá di partisipá na e konferensia?
Profeshonal di merkadeo i benta, consultant, entidat di gobièrnu, agente di servisio na kliente, Inmigrashon, Duana, taksista, funshonario di haf i aeropuerto, kompania di utilidat, komèrsio por detal, guia turístiko, edukadó, empresario, representantenan di NGO, studiante di universidat i públiko general interesá den e tópikonan ku lo keda tratá.

Kiko mester hasi pa por partisipá?
Pa haña e programa kompleto i registrá pa e seshonnan grátis i e presentashonnan durante lùnch, por bai na www.curacao.com/ntc2018.

Most recent