WILLEMSTAD- 1 di febrüari 2018 – Tur aña di nobo Kòrsou ta den gran espektativa pa e lista di nominado pa e ‘USA Today 10 Best Readers’ Choice Travel Awards’. E aña aki Kòrsou a risibí nominashon den 5 kategoria. Ta trata di e siguiente kategorianan: ‘Best Caribbean Golf Course’ pa Old Quarry Golf Course na Santa Barbara Plantation, ‘Best Caribbean Resort’ pa Baoase Luxury Resort, ‘Best Caribbean Beach’ pa Cas Abao Beach, ‘Best Caribbean Attraction’ pa Shete Boka National Park i finalmente tambe pa ‘Best Restaurant in the Caribbean’ pa Kome Restaurant.
Un grupo di eksperto di biahe a selektá Kòrsou pa partisipá den e kompetensia aki. Kantidat di voto di kada bishitante di e wèpsait lo resultá den e fórmula final pa saka ganador di kada kategoria. Por vota tur dia, te ku dia 5 di febrüari 2018. Pa vota por bishitá e wèpsait di USA Today su ‘10 Best Travel Award’ òf sigui e link http://www.10best.com/awards/travel/ . Ofisina di Turismo di Kòrsou (CTB) ta invitá nos komunidat pa vota pa Kòrsou. Kada voto ta importante pa yuda Kòrsou gana USA Today su ‘10 Best Readers’ Choice Travel Awards’. E ganadornan lo keda anunsiá pa USA Today dia 9 di febrüari próksimo.
