Kurso ‘Guia Turístiko i Hospitalidat’ pa hóben a start

September 12, 2017

80 hóben ta partisipá…
WILLEMSTAD- 11 di sèptèmber 2017 – Ku e meta pa baha desempleo bou di hóben i pa duna un aporte na desaroyo turístiko, CTB den estrecho koperashon ku SOAW i Reda Sosial a lansa un proyekto pa entrená hóbennan desempleá pa bira entreprenùr, Guia Turístiko òf pa traha den sektor di hospitalidat. Ta trata aki di un programa di sertifikashon pa hóbennan entre 18 i 33 aña ku durante un periodo di 6 luna lo haña un kurso intensivo di Guia Turístiko i Hospitalidat. Un total di 80 hóben a start awe ku e kurso. Na apertura di e kurso a hiba palabra Minister enkargá ku Desaroyo Ekonómiko, Dr. Steven Martina, Minister enkargá ku Desaroyo Sosial, Labor i Bienestar, sr. Hensley Koeiman, sr. Wilfred Bonafacia, Direktor di Reda Sosial i e trainer (OneCuraçao), sr. Emlyn Pietersz.

Aktualmente tin un eskases di Guia Turístiko sertifiká. Meta di e kurso aki ta pa entrená hóbennan entre 18 i 33 aña pa bira entreprenùr, Guia Turístiko òf pa traha den sektor di hospitalidat. Tambe e intenshon ta pa baha e skarsedat aktual pa Guia Turístiko dor di sòru ku hóbennan ku a sigui e training ku éksito por bai hasi e trabou aki.

E partidonan envolví den e proyekto aki ta, Ofisina di Turismo di Kòrsou (CTB) ku ta enkargá ku kordinashon di e kurso den su totalidat i ta kubri parti finansiero di e proyekto kual ta enserá gastunan di promoshon i gastunan relashoná ku e kursistanan. SOAW ku ta enkargá ku inskripshon, e proseso di selekshon i formashon sosial di e partisipantenan i lo duna un kontribushon finansiero pa kubri gastunan relashoná ku e kursistanan. Reda Sosial ku ta kubri e gastunan envolví ku e kurso i OneCuraçao ku ta e organisashon sertifiká di ‘Tourist Guide & Hospitality Training’ ku lo ta enkargá ku e kurso, material pa lès i lokashon. E kurso ta tuma lugá di sèptèmber 2017 pa mart 2018.

CTB, SOAW i tambe Reda Sosial ta deseá e kursistanan hopi éksito ku e kurso i ta spera di por topa ku kada unu di nan na mart 2018 na momentu ku e kurso finalisá.

Most recent