WILLEMSTAD- 7 di ougùstùs 2017 – Ofisina di Turismo di Kòrsou (CTB) ta informá di a tuma nota di publikashonnan riba medionan sosial kaminda ta indiká ku CTB lo a sera un akuerdo ku Uber sin a konsulta ku shofùrnan di taksi aki na Kòrsou. Uber ta un konsepto internashonal kaminda konduktornan privá ta afiliá i ta brinda nan servisio di transportá pa òf for di un sitio na klientenan. Reservashon pa esaki e kliente ta hasi online i e pago ta bai via di su tarheta di krédito. E informashon ku CTB lo a sera un akuerdo ku Uber pa brinda e servisio aki na Kòrsou no ta kuadra ku bèrdat.
CTB no ta e instansia outorisá pa drenta ningun tipo di akuerdo ku ta enserá transporte komo ku esaki no ta kai bou di e kompetensianan di e ofisina. Ademas CTB no ta kere ku un tipo di konsepto manera esun di Uber lo funshoná na Kòrsou mirando nos leinan aktual.
CTB a tuma nota tambe ku den e informashon ku a sali riba medionan sosial kaminda ta propagandá e servisio di Uber na Kòrsou ta hasi uso inkorektamente di CTB su logo di merkadeo kual lo por duna e impreshon ku CTB ta asosiá ku e servisio aki. Ta trata aki di un logo protehá pa kual motibu CTB kier informá ku no ta outorisá pa usa e logo di CTB sin outorisashon di e ofisina.
