WILLEMSTAD – 9 di yüni 2017 – Meskos ku añanan anterior, riba invitashon di Ofisina di Turismo di Kòrsou (CTB), Dr. Peter Tarlow a kompartí e último desaroyonan riba tereno di seguridat na nivel mundial, ku énfasis riba Kòrsou. Dr. Tarlow, ta un eksperto riba tereno di krímen i terorismo den industria turístiko i ta direktor di e organisashon renombrá, Tourism & More Inc. ku ta enfoká spesífikamente riba entrenamentu di kuerponan di seguridat den industria turístiko. For di 5 te ku 8 di yüni último Dr. Tarlow a duna training na diferente persona ku tur dia ta direktamente òf indirektamente enbolbí ku seguridat di e turista i di nos komunidat. E aña aki a enfoká riba un mihó komunikashon durante aktonan di terorismo inesperá. Un total di 70 persona a partisipá na e seshon aki. Minister enkargá ku Desaroyo Ekonómiko sr. Steven Martina tambe tabata presente durante di e entrega di sertifikado.
E enfoke durante e seshon “Komunikashon durante aktonan di terorismo inesperá” tabata pa siña e agente di seguridat pensa bou di preshon, kon pa komuniká di e mihó forma posibel i yuda desaroyá un mihó liña di komunikashon entre kuerponan di seguridat pa den kaso di kualke akshon di terorismo. Na 2014 i 2015 tambe CTB a kordiná un entrenamentu básiko i avansá riba e aspekto di seguridat kual a keda bon risibí serka agentenan di seguridat.
E partisipantenan e aña aki a inkluí agentenan di seguridat di Curaçao Ports Authority, Curaçao Airport Partners, Brantwer Airport, Imigrashon, Duana Kòrsou, Kuerpo Polisial Kòrsou i Politur, Kuerpo di Brantwer Kòrsou, Warda Kosta, agentenan di seguridat di diferente hotèl manera Papagayo Curaçao, Renaissance CuraçaoResort & Casino, BaoaseLuxuryResort, Sunscape Curaçao Resort, Spa & Casino, Santa Barbara Beach & Golf Resort, Lions Dive & Beach Resort Curaçao iHawk Eye Security. Otro partisipantenan indirektamente enbolbí den seguridat di industria turístiko ta StichtingSlachtofferhulp Curaçao, Stichting Maatschappelijke Zorg en Herstel i Departamentu di Desaroyo di Produkto di CTB.
CTB ta gradisí tur partisipante pa nan partisipashon aktivo na e seshonnan i ta konta ku nan lo bai hasi bon uso di e konosementu atkerí den nan trabou diario.
