CTO ta agregá un kategoria nobo na ‘Sustainable Tourism Awards 2017’

May 3, 2017

Por apliká te ku dia 31 di mei próksimo…
WILLEMSTAD – 3 mei 2017– E organisashon di turismo den Karibe, Caribbean Tourism Organization (CTO) a agregá un kategoria nobo na e ‘Sustainable Tourism Awards’ di e aña aki. E kategoria ‘Agro-Tourism’ a keda diseñá pa reflehá e tema di CTO e aña aki kual ta aventura i tambe komo parti di e koperashon entre CTO i e organisashon Inter-American Institute for Cooperation on Agriculture (IICA), na unda ta realisando esfuersonan konhunto pa integrá agrikultura den turismo.

“Na momentu ku un turista bishitá un tereno di agrikultura, realisá un rekorido òf kome platonan típiko prepará pa shèfnan lokal, tur hende ta benefisiá. Terenonan ta wòrdu usa pa agrikultura, entradanan pa agrikultornan ta oumentá, ta krea oportunidat di negoshi i kuponan di trabou, medioambiente ta keda preservá i e komunidat su salú i seguridat di nos alimentashon ta keda mehorá,” esaki di akuerdo ku Ena Harvey di IICA. “Esaki ta loke un bida sostenibel ta nifiká; i por keda lográ ora agrikultura keda integrá ku turismo,” el a añadí.

E Agro-Tourism Award ta habrí pa kualke grupo, organisashon, empresa turístiko òf atrakshon ku ta ofresé produktonan agro-toursim kual ta enserá e elementonan di produkshon di kuminda i e eksperensia di e bishitante. Tur ku apliká mester por demostrá kon den forma eksitoso nan a logra integrá agrikultura i e industria turístiko kual ta promové pa kompartí i preservá agrikultura lokal i herensia kulinario.

Por apliká den e siguiente kategorianan:

  • Excellence in Sustainable Tourism Award (Ekselensia den Turismo Sostenibel)
  • Destination Stewardship Award (Maneho den Destinashon)
  • Sustainable Accommodation Award (Akomodashon Sostenibel)
  • Community Benefit Award (Benefisio na Komunidat)
  • Heritage Protection Award (Protekshon di Herensia)
  • Biodiversity Conservation Award (Konservashon di Biodiversidat)
  • Agro-Tourism Award in honor of the CTO Year of Adventure (Turismo Agríkola)

E programa di CTO ta eksistí pa 13 aña kaba i ta rekonosé produktonan úniko i inovativo ku ta yuda promové konseptonan di turismo sostenibel i su balornan fundamental i na mes momentu ta yuda alsa e produktonan turístiko ku ta keda ofresé. Un pènel di spesialistanan regional i internashonal riba tereno di turismo sostenibel lo selektá e proyektonan ganador. E premio ta enserá entre otro un trep ku tur kos inkluí pa por asistí na e seremonia di premiashon i di e manera ei risibí e plakat di rekonosementu. E premio mes, lo keda entregá sèptèmber próksimo durante un di e eventonan di CTO ku e aña aki lo tuma lugá na St. Kitts and Nevis. Último fecha pa entregá aplikashon ta dia 31 di mei próksimo. Pa mas informashon, inkluyendo guia di inskripshon por bishita e websáit http://www.onecaribbean.org/caribbean-sustainable-tourism-awards

Most recent