WILLEMSTAD- 5 di yüli 2016 – Den preparashon pa e di 7 edishon di Curaçao North Sea Jazz Festival (CNSJF), CTB huntu ku e tim di promoshon di CNSJF a bishitá Sürnam, na unda un biaha mas e reakshon pa e festival tabata inmenso. Durante di e dianan di promoshon a presentá e artistanan di e aña aki na prensa, agentenan di biahe i algun invitado spesial. Na yegada di e delegashon na Sürnam ya kaba prensa a publiká potrèt riba retnan sosial i ku gran entusiasmo tabata pendiente pa e anochi di informashon.
Huntu ku Fundashon Bon Intenshon (FBI), CTB ta sigui hasi esfuerso pa posishoná e festival komo un evento ku bo mester bishitá aki na Kòrsou. A hasi bishita na diferente medionan di komunikashon entre nan radio i televishon. Nos elegante Miss Kòrsou 2015, srta. Kanisha Sluis a kompañá e delegashon di CTB i FBI riba e bishita promoshonal na Sürnam. A organisá un seshon di Meet & Greet ku a konta ku partisipashon di 150 persona konsistiendo di diferente miembro di prensa, agente di biahe, operador di tour, representantenan di aerolíneanan i otro invitadonan. E evento a tuma lugá na Don Julio’s Bar Bistro. Aki a presentá den un ambiente musikal e artistanan pa e di 7 edishon ofisialmente. Esnan presente a risibí kòktelnan trahá ku Curaçao Liqueur i algun pasapalu krioyo. Tambe, a rifa 4 pakete pa e festival. Dos miembro di prensa a gana kada un 1 pakete, miéntras ku durante di e evento di lansamentu tambe 2 bishitante a gana pakete kompletu pa eksperensiá CNSJF 2016.
E aña aki un biaha mas ta konta ku artistanan di taya, manera Juan Luis Guerra, Kassav, Lenny Kravitz, Tom Jones, J. Balvin, Chris Brown i diferente artista mas. E festival sigur lo atraé bishitantenan for di region Karibe i Latino Amérika. Mayoria di e bishitantenan aki ta yega 2 pa 3 dia promé ku e evento pa asina por disfrutá di nos pais. Pa e bishita promoshonal na Sürnam, CTB a konta ku partisipashon di City Suites Curaçao, Papagayo Hotel & Resort i Scooby Tours. Anualmente Sürnam ta entre e tres paisnan ku ta pèrkurá pa mas tantu bishitante durante di e dianan di CNSJF.
