WILLEMSTAD – 20 di yüni 2016 – Resientemente Ofisina di Turismo di Kòrsou (CTB) a organisá un workshop di ‘Social Media’ pa partnernan den sektor priva. E ophetivo di e workshop tabata pa alsa e konosementu di e importansia di posibilidatnan di merkadeo online pa sektor di turismo i hospitalidat. Esaki ta benefisioso pa tantu partnernan den industria komo nos ekonomia lokal. E partisipantenan na e workshop a inkluí entre otro representantenan di: hotèl, restorant, liña aéreo, atrakshonnan turístiko, sektor públiko i otro entidatnan ku ta aktivo den e industria di turismo i riba medionan sosial. Minister di Ekonomia, sr. Eugene Rhuggenaath a trese un palabra di bon bini na apertura di e workshop.
E partisipantenan a risibí hèrmèntnan stratégiko kual nan por apliká den nan trabounan diario. E workshop a konsistí di 3 ophetivo pa e partisipantenan: 1) proveé partisipantenan ku e instrumèntnan nesesario pa eksplorá i sigurá nan strategia pa ku uso di medionan sosial, 2) yuda partnernan stratégiko pa sigurá ku nan ta usando e mihó kanalnan di medionan sosial pa por logra nan ophetivonan, 3) usa ehèmpelnan di medionan sosial di e partisipantenan pa yuda reforsá práktikanan aktual i identifiká oportunidatnan nobo.
E workshop a keda duná pa sr. Mike Brown, fundadó di Brainzooming Group. Brainzooming Group, ta un kompania ku ta enfoká riba yuda klientenan krea impakto stratégiko i resultadonan ekstraordinario. Sr. Brown ta kontribuí regularmente na e revista The Social Media Monthly i ta tambe un blogger diario riba tópikonan manera strategia, kreatividat, inovashon i komersio sosial. Sr. Brown tabatin kombersashon i konsulta ku markanan manera Sprint, Johnson & Johnson, Trane, Bayer, gobièrnu di Estado Unídos i hopi mas.
E workshop tabata hopi interaktivo i yená ku algun detaye interesante relashoná ku e mundu di medionan sosial.
