…1500 agente di biahe a partisipá…
WILLEMSTAD- 18 di novèmber 2015:- Di 6 pa 9 di novèmber último Ofisina di Turismo di Kòrsou (CTB) a partisipá na e ekshibishon Rewe Programmvorstellung na Alemania ku a keda organisá pa DER Touristik Group. DER Touristik Group ta representá 6 operador di tour kualnan ta DERTOUR, Meier´s Weltreisen, ADAC Reisen in Frankfurt, ITS, Jahn Reisen i Tjaereborg. Un total di 1500 agente di biaha di Alemania a partisipá na e ekshibishon aki.
Tur aña di nobo DER Touristik ta invitá agentenan di biahe pa informá nan di e programa di e aña benidero i tambe e partnernan ku ta forma parti di e programa. E biaha aki a dirigí riba e paketenan spesial pa aña 2016. DER Touristik ta bende paketenan i trep individual pa bishitá diferente destinashon inkluyendo Kòrsou. CTB tabata presente na e ekshibishon pa asina kompartí informashon di loke Kòrsou tin di ofresé komo destinashon turístiko den Karibe. E representante di Kòrsou a forma parti di e booth di AGK (Arbeitsgemeinschaft Karibik) ku ta un organisashon pa islanan den Karibe ku ta organisá diferente eventonan pa e merkadonan aleman. Huntu ku Kòrsou tabatin representantenan di entre otro: St. Lucia, Aruba, Barbados, BVI, Puerto Rico, Jamaica i Tobago.
Partisipashon na e tipo di eventonan aki ta importante pa keda informá e agentenan di biahe di e produkto ku Kòrsou ta ofresé komo destinashon turístiko.
