WILLEMSTAD- 28 di òktober 2015:- Resientemente USA Today a publiká riba su wepsáit e lista di nominashon pa su ‘10 Best Readers’ Choice Travel Award’. Kòrsou a risibí nominashon den 4 kategoria, ‘Best Caribbean Destination for food’, ‘Best Caribbean Destination for Golf’, ‘Best Caribbean Destination for Nightlife’ i ‘Best Caribbean Destination for Shopping’. Un grupo di ekspertonan di biahe a selektá Kòrsou pa partisipá den e kompetensia aki. E kantidat di voto di kada bishitante di e wepsáit lo resultá den e fórmula final pa saka e ganador di kada kategoria. Por vota te ku dia 9 di novèmber próksimo.
Loke ta hasi USA Today su ‘10 Best Readers’ Choice Travel Award’ importante ta ku tur hende rònt mundu por vota pa nan destinashon preferí. Ofisina di Turismo di Kòrsou (CTB) via di su página di facebook ta pidi turistanan ku a yega di bishitá Kòrsou pero tambe esnan ku no a bishitá nos pais ainda pa vota pa Kòrsou. Tambe na mes momentu CTB ke enkurashá nos komunidat pa tambe vota pa asina Kòrsou por keda skohe den un òf mas di e kategorianan ariba menshoná. Ku kada nominashon nos tin e oportunidat pa posishoná Kòrsou komo un destinashon lider den Karibe. Por vota via di e link www.voteforcuracao.com kual ta hiba bo na e wepsáit di USA Today. Dia 13 di novèmber USA Today lo anunsiá e ganadornan.Kada persona por vota 1 bes pa dia. CTB ta sigui apoyá tur oportunidat kaminda Kòrsou por sigui sobresalí internashonalmente. Ban vota pa Kòrsou!
