…60 empleado a finalisá e training ku éksito…
WILLEMSTAD- 8 sèptèmber 2015:- Dianan 7 i 8 di sèptèmber último Dr. Peter Tarlow di Tourism & More Inc. a duna training na diferente persona ku tur dia ta enbolbí ku seguridat di e turista i di nos komunidat. Meskos ku aña pasá, riba invitashon di Ofisina di Turismo di Kòrsou (CTB), Dr. Tarlow a kompartí e último desaroyonan di seguridat di turismo riba nivel mundial ku énfasis riba Kòrsou. E propósito di e trainingnan aki ta pa suministrá, kompartí i aktualisá konosementu di e personal di seguridat ku ta den kontakto direkto òf indirekto ku e industria turístiko. E aña aki e Safety & Security Training su focus tabata riba “The Art of Communication & Listening Skills” esta e arte di por dominá e abilidat di komuniká i skucha. Esnan ku a forma parti di e training básiko tabata empleadonan di CPA, CAP, Imigrashon, Duana, Kuerpo Polisial Kòrsou, Brantwer, POLITUR i Warda Kosta. Un total di 60 partisipante a finalisá e training ku éksito i a risibí nan sertifikado. Na e entrega di sertifikado a hiba palabra sr. Hugo Clarinda direktor interino di CTB i Dr. Peter Tarlow di Tourism & More Inc.
Dr. Peter Tarlow ta un orador mundialmente konosí i un eksperto riba e impakto di krímen i terorismo den industria turístiko. Despues di e eksitoso promé ‘Safety & Security Training’ na 2014 e partisipantenan a indiká di ta masha interesá pa sigui risibí entrenamentu i kurso den nan área di trabou. CTB ta kere firmemente ku mester keda forma i desaroyá personal di tur departamentu enbolbí den e sektor turístiko. Ku seshonnan manera esun duná dor di Dr. Tarlow esaki ta posibel.
CTB ta sigur ku e training lo yuda desaroyá i mehorá kada partisipante su manera di komuniká i skucha. Alabes e training ta yuda tambe pa prepará e partisipante pa diserní kada situashon i prevení insidentenan ku por perhudiká bida di e bishitante, e lokal i e imágen di nos industria turístiko den su totalidat. Ya kaba a skematisá un seshon intermedio ku lo tuma lugá na aña 2016. Ta trainingnan manera esaki ta yuda ekipá empleadonan ku e hèrmèntnan nesesario pa atendé insidentenan ku por tin influensha direkto i indirekto riba nos industria turístiko. CTB ta gradisí tur ku a partisipá na e training pa nan entusiasmo i dedikashon.
