WILLEMSTAD- 19 ougùstùs 2015– Ofisina di Turismo di Kòrsou (CTB) resientemente a duna rekonosementu na 6 operador di buseo. E meta di e programa di sertifikashon ta pa introdusí standarisashon den e mundu di buseo i asina alkansá oumento di seguridat pa e bushi i e turista, benefisionan ekonómiko i rekonosementu na esnan ku tur dia ta ehersé e trabou. Pa por risibí sertifikashon e operadornan mester kumpli ku eksigensianan den vários aspekto di buseo e.o, training, edukashon, buseo organisá pa bushinan sertifiká i hürmentu di ekipo di buseo. Na momentu ku hasi petishon pa partisipá den e programa di sertifikashon un grupo di eksperto ta bishitá e ‘dive shop’ i ta kontrolá si nan ta kumpli ku e kriterionan pa wòrdu sertifiká. CTB tin un akuerdo ku Curaçao Innovation & Technology Institute (CITI) ku ta enkargá ku e parti di e kòntròl na e establesimentunan.
Resientemente, B Diving & Watersports, Dive’n Curaçao, Curaçao Divers, LA Dive Center, Curious2Dive, Dive Center Scuba Do i All in One Watersports a risibí sertifikashon di CTB. Kòrsou su produkto turístiko ta konta ku 6 establesimentu di buseo mas ku ta sertifiká, en total tin 19 operador di buseo sertifiká pa CTB. Masha pabien na tur e operadornan di buseo ku nan sertifikashon!
