Eksitoso presentashon di Kòrsou durante ITB 2015

March 10, 2015

WILLEMSTAD – 10 di mart 2015 – Kòrsou por mira bèk riba un eksitoso partisipashon na e feria di biahe di mas grandi na mundu, ITB (Internationale Tourismus-Börse Berlin). ITB ta risibí anualmente mas di 110.000 bishitante; esaki ta hasié un di e plataformanan empresarial mas importante brindando ofertanan turístiko pa destinashonnan rònt mundu.

Un biaha mas por bisa ku e representantenan di Kòrsou a sa di brinda bishitantenan na e stènt un ñapa di loke Kòrsou ta ofresé komo destinashon turístiko. Riba e promé dia, representantenan di CTB i miembronan di prensa a sosialisá durante un evento eksklusivo kaminda ku nan tabatin e oportunidat di disfrutá di algu di bebe i kome for di e ‘kushina krioyo’ di Kòrsou.Ademas di esaki a ofresé miembronan di prensa un espasio eksklusivo na unda nan por a relahá den un ambiente karibense i disfrutá di pasaboka krioyo i algu di bebe. Esnan ku tabata deseá por a hasi uso di e oportunidat tambe pa karga nan telefon selular òf kualkier otro unidat mobil, ya asina por a sigui duna kobertura na ITB. Durante di e feria a brinda miembronan di prensa akseso eksklusivo na Kòrsou su ‘Media database’ nobo ku lo keda lansá pa e merkado aleman despues di ITB. E banko di dato aki a wòrdu diseñá komo un hèrmènt útil spesialmente pa profeshonalnan den media ku teksto i tambe imágennan di Kòrsou ku nan lo por usa ora di promové nos isla komo destinashon den Karibe. E banko di dato ta duna posibilidat pa download e kontenido i tambe pa buska informashon hasiendo uso di algun filter di búskeda práktiko. Di e manera aki e miembronan di prensa tin un fuente kargá ku informashon di Kòrsou na nan disposishon.

CTB i su partnernan a tene tambe durante di e feria diferente reunion kaminda a estrechá lasonan empresarial. E merkado europeo ta kresiendo riba un base struktural i ta un merkado di sumo importansia pa nos isla. Na 2014 Kòrsou a risibí mas di 180.000 bishitante for di Europa.

Most recent