…..yegando na un total di 18 operador di buseo sertifiká….
WILLEMSTAD- 11 di desèmber 2014: Resientemente Ofisina di Turismo di Kòrsou (CTB) a honra 6 operador di buseo mas ku a pasa e programa di sertifikashon ku éksito. Ta trata aki di Atlantis Watersports,Discoverdiving,Dive Nas,Goby Divers,Scubalodge iAnimal Encounters. Na yüli último un total di 12 operador di buseo a risibí nan sertifikashon yegando awor na un total di 18 operador di buseo sertifiká. Meta di e programa ta pa perkurá ku establesimentunan den turismo ta funshoná konsistentemente riba e nivel ku e bishitante ta spera di nos destinashon, di manera ku e eksperensia riba nos isla ta satisfaktorio.
Pa e programa di sertifikashon, CTB tin un akuerdo ku Curaçao Innovation&Technology Institute (CITI) ku ta esun ku ta hasi e kòntròl na e establesimentunan. E programa ta enserá ku un grupo di eksperto ta bishita e establesimentunan ku a indiká ku nan ke partisipá i ta kontrolá si nan ta kumpli ku kriterionan di entre otro seguridat i servisio. E ekspektativa ta ku próksimamente mas establesimentu lo keda sertifiká. E 6 establesimentunan a risibí un plakat na man di direktor interino di CTB, sr. Hugo Clarinda.
