…..diferente aktor enbolbí ku e tópiko di seguridat di turista ta partisipá……
WILLEMSTAD- 1 sèptèmber 2014:- Entrante 1 di sèptèmber te ku 5 di sèptèmber un grupo grandi ku ta konsistí di diferente aktor enbolbí ku e tópiko di seguridat di turista ta partisipando na un programa di training dirigí riba e tópiko di seguridat. Durante di e apertura a hiba palabra Minister di Hustisia sr. Nelson Navarro, Dr. Peter Tarlow kual ta un di e trainernan i tambe sr. Hugo Clarinda di Ofisina di Turismo di Kòrsou (CTB). Minister Navarro a para ketu entre otro riba e aspekto di seguridat di e turista i e importansia di kuerpo di POLITUR ku pronto lo habri su di tres pòst.
Meta prinsipal di e training ta pa oumentá e nivel di konsiensia tokante e medidanan di seguridat i protekshon, alabes perfekshoná e trabounan pa di e forma ei kontribuí na un ambiente mas sigur tantu pa e empleado komo esnan ku ta bishitá nos isla. Ademas di esaki e training lo yuda e partisipante pa e ta mihó prepará pa identifiká, enfrentá i respondé riba menasanan direkto i indirekto. Tambe e training lo prepará e partisipante pa diserní kada situashon i prevení insidentenan ku por perhudiká bida di e empleado, bida di e bishitante i e imágen di nos industria turístiko den su totalidat. E gruponan ku ta partisipá na e training ta konsistí di POLITUR, Kuerpo Polisial Kòrsou, Konsulado Merikano, agentenan di seguridat na aeropuerto, haf, imigrashon, duana, hotèl, playa i tambe diferente personal di seguridat privá ku ta laborá den e arianan turístiko.
E programa di training ta keda duná pa Dr. Peter Tarlow ku ta un orador mundialmente konosí i un eksperto riba e impakto di krímen i terorismo riba industria turístiko i sr. Jason Keller ku ta konosí pa su eksperensia riba e tereno di seguridat personal. Aktualmente e ta laborando komo polis dirigí riba e aspekto di krímen riba kaya. Lo trata diferente tópiko durante e training manera (1) seguridat di turismo i servisio na kliente, (2) seguridat di turismo i diferente kultura, (3) seguridat di turismo i industria turístiko, (4) turismo i terorismo, (5) turismo i desaroyo di komunidat i finalmente un charla riba komportashon di e bishitante. E training ta konsistí di un parti teorétiko i práktiko. Kada dia di training lo konta ku partisipashon di mas òf ménos 50 persona.
CTB ta gradisí Curaçao Ports Authority, Curaçao Airport Holding i Curaçao Airport Partners pa nan kontribushon na realisashon di e programa di training. Ta trainingnan manera esaki ta yuda ekipá empleadonan ku e hèrmèntnan nesesario pa atendé insidentenan ku por tin influensha direkto riba nos industria turístiko. Éksito na tur partisipante.
