WILLEMSTAD – 5 di novèmber 2026 –Ofisina di Turismo di Kòrsou (CTB) a publiká e rapòrt ‘The Blue Wave Impact Report 2026’. E rapòrt ta dokumentá kon e selekshon nashonal di futbòl di Kòrsou a hiba nòmber di Kòrsou na públiko rònt mundu, for di klasifikashon pa Kopa Mundial riba 18 di novèmber 2025 te ku e partidonan di fase di grupo na yüni 2026. Kòrsou tabata den notisia rònt mundu, ku publikashonnan den medionan na Nort Amérika, Latino Amérika i Europa, ku un alkanse kombiná estimá di 29.5 bion. Resientemente, direktor di CTB, Muryad de Bruin a hasi entrega ofisial di e rapòrt na Minister di Desaroyo Ekonómiko, Roderick Middelhof.
E logro históriko di e selekshon a trese atenshon internashonal riba Kòrsou komo destinashon. CTB, den estrecho kolaborashon ku su partnernan, inkluyendo agensianan regional di PR, partnernan di media, e industria di biahe i tambe su representantenan den e merkadonan di Nort Amérika, Latino Amérika i Europa, a sa di transformá e entusiasmo rondó di e selekshon den kobertura den media, eventonan, visibilidat digital i kampañanan pagá ku a konta e historia mas amplio di Kòrsou, su hendenan, su kultura i su hospitalidat.
Algun di e resultadonan prinsipal:
- 30.400 publikashon den medionan na Nort Amérika, Latino Amérika i Europa, ku un alkanse (reach) kombiná di 29.5 bion. Alkanse ta midi e kantidat total di biaha ku un notisia a keda eksponé, pues e mesun persona por keda kontá mas ku un biaha.
- Direktor di CTB, sr. Muryad de Bruin a duna entrevista na entre otro: KHOU-TV (Houston), FOX 29’s Good Day Philadelphia, CW17 i 6ABC.
- Curacao.com a registrá 3.75 mion seshon i 83.5 mion impreshon den Google Search. E tráfiko a yega su punto mas haltu riba 14-15 di yüni, despues di e partido Kòrsou kontra Alemania. E siman ei, e páginanan “Where is Curaçao?” a atraé hopi tráfiko na ingles, portugues, aleman i franses.
- Brazil só a produsí 18.705 publikashon i a representá 32.1% di tur bishita riba curacao.com, mas ku tur otro pais.
- E Blue Wave Village na Houston riba 14 di yüni a atraé 1200 fanátiko. BBC News, Bloomberg, NOS i Houston Chronicle a raportá bibu for di e Village, miéntras NBC Nightly News a graba un segmentu.
- CTB a invitá mas di 15 prensa internashonal Kòrsou inkluyendo Sports Illustrated, CBS Sports, Telemundo Deportes, Globo Esporte, ESPN Brasil i dos dokumental di televishon aleman (ARD i Galileo/ProSieben). E prensanan aki a mustra Kòrsou su kultura, kuminda i hospitalidat, no solamente su futbòl.
- E rekonosementu di e selekshon den Guinness World Records a hala hopi atenshon den notisia na Brazil.
- Menshon di Kòrsou riba plataformanan di AI manera ChatGPT i Gemini a subi ku 10.6% durante e periodo di e torneo.
E rapòrt ta konkluí ku e visibilidat ku a logra ta un fundeshi, no un resultado final. CTB lo konstruí riba e relashonnan nobo ku medionan internashonal, e patronchi di tráfiko establesé riba curacao.com, Kòrsou su presensia kresiente riba plataformanan di AI, i e relashon ku a keda formá ku partnernan/fanátikonan ku a partisipá na e diferente eventonan. E Blue Wave Impact Report 2026 kompletu ta disponibel riba curacaotouristboard.com, bai na ‘Data & Stats’ i click riba ‘Tourism Reports’.
