WILLEMSTAD – 31 di ougùstùs 2026 – Sabor Barranquilla, ta e feria gastronómiko di mas grandi na Colombia. E feria di 4 dia a reuní profeshonalnan den sektor kulinario tantu na nivel nashonal komo internashonal huntu ku empresanan den e sektor di kuminda i bebida i empresarionan. Kòrsou su partisipashon komo invitado di honor na Sabor Barranquilla a brinda e plataforma ekselente pa presentá Kòrsou su gastronomia, kultura vibrante i produkto turístiko amplio. Durante e apertura di e feria, Ofisina di Turismo di Kòrsou (CTB) a kompartí un mensahe di video den kual Minister di Desaroyo Ekonómiko, sr. Roderick Middelhof a asentuá loke Kòrsou i Colombia tin similar, Kòrsou su herensia kulinario riku i e karakterístikanan úniko ku ta tipifiká Kòrsou komo destinashon turístiko. Riba e stage prinsipal a kompartí platonan típiko di Kòrsou prepará pa un kòki i pastry chef di Kòrsou
E feria di e aña aki a konta ku un averahe di 5000 bishitante pa dia inkluyendo mayoristanan, representantenan di media, partnernan kulinario i konsumidónan. Banda di kompartí platonan típiko di Kòrsou riba e stage prinsipal kual huradonan i invitadonan por a purba, CTB a sòru tambe pa presentashon di diferente baile tradishonal di Kòrsou manera Seú, tambú, wals, danza i tumba. Ademas, na e stènt di Kòrsou e bishitante por a haña informashon amplio di Kòrsou su produkto turístiko i purba diferente tipo di pasapalu i kos di boka dushi di Kòrsou.
Partisipashon di Kòrsou na Sabor Barranquilla a brinda un plataforma balioso pa presentá e gastronomia riku i kultura vibrante di nos isla, miéntras ku na mes momentu a sigui fortalesé presensia i visibilidat di Kòrsou den e merkado kolombiano.
