WILLEMSTAD – 7 di aprel 2026 – Ofisina di Turismo di Kòrsou (CTB), ku tin e lisensia di e frankisia di Miss Universe Curaçao, ta informá ku sr. Gionel Virginie, representando Curaçao International Crowned Queens, a keda selekshoná komo partner organisadó di Miss Universe Curaçao, edishonnan 2026-2027.
E eskoho ta resultado di un destaho públiko strukturá i transparente, kaminda e evaluashon a keda kondusí pa un komité di ekspertonan den turismo i kultura, ku supervishon gubernamental i tékniko riba e materia. Basá riba e puntuashon i evaluashon di e kriterionan, Curaçao International Crowned Queens a sali na e posishon mas haltu, demostrando un eksperensia sólido den organisashon di konkursonan di beyesa, ku un vishon kla i profeshonal i ku e kapasidat operashonal pa kumpli ku e standardnan internashonal.
Kòrsou su partisipashon di riba 60 aña na Miss Universe a pone nos pais riba un plataforma internashonal rekonosé. Partisipashon den e próksimo kompetensia di 75 aña di Miss Universe na luna di novèmber awor ta nifiká un oportunidat mas pa promové Kòrsou riba un esenario global. Den estrecho kolaborashon ku Curaçao International Crowned Queens, CTB lo sigurá un representashon fuerte i kompetitivo ku ta reflehá nos kultura vibrante, nos historia riku i beyesa natural di nos pais.
Mas despues lo kompartí detaye di e programa di Miss Universe Curaçao.
