Na Handelskade…
WILLEMSTAD – 11 di novèmber 2025 – Resientemente Ofisina di Turismo di Kòrsou (CTB) a hasi apertura ofisial di e Curaçao Information Center pa sirbi turista krusero i di estadia. Aki turistanan por haña informashon i rekomendashon relashoná ku atrakshonnan turístiko, akomodashon, restorant, medionan di transporte, eventonan i aktividatnan na Kòrsou. E sentro di informashon ta situá na Handelskade enfrente di e terminal di fèrinan. Komo parti di CTB su esfuersonan pa kontribuí na práktikanan sostenibel, e bali di e sentro di informashon ta trahá di plèstik resiklá i e bankinan den e sentro ta trahá di palu resiklá. Ademas komo CTB ta partner di Club 17 Curaçao, a laga inkluí e sentro di informashon riba e mapa di stashonnan kaminda un persona por yena su bòter duradero ku awa. Den e sentro tin un aparato ku mesora ta ilustrá e kantidat di bòter di plèstik ku a keda di spar ku e inisiativa aki. Apertura ofisial di Curaçao Information Center a keda hasí pa Minister di Desaroyo Ekonómiko, Roderick Middelhof i Direktor di CTB, Muryad de Bruin.
E parti pafó di e edifisio di e sentro di informashon ta inkluí un diseño vibrante di artista lokal Deidre Polonius. Kada diseño kolorido ta reflehá algu spesial di Kòrsou. E edifisionan íkono, Kòrsou su playanan outéntiko, bida bou di laman, historia, herensia, naturalesa i elementonan kultural. E sentro di informashon a habri su porta no ofisial na luna di yüni último i ya kaba a sirbi diferente turista ku a drenta pa risibí informashon. Banda di e sentro di informashon a habri tambe un ofisina di Politur, pa asina sòru pa seguridat den área di sentro di siudat. Tambe H2 Care Medical Service Curaçao tei den e ofisina di Politur pa duna asistensia médiko.
CTB ta gradisí tur ku a aportá na realisashon di e Curaçao Information Center. E sentro ta habrí di djaluna pa djasabra di 9or di mainta pa 6or atardi. Durante e temporada haltu di turismo krusero, dianan di fiesta i eventonan spesial tambe e sentro lo ta habrí pa duna e servisio ku ta keda rekerí.
