WILLEMSTAD – 19 di mei 2025 – Resientemente un total di 57 partisipante a risibí nan sertifikado komo parti di e programa di training Her & Bijscholingstraject Hospitality Sector. E kursistanan a sigui un kurso kòrtiku intensivo (crash course) den kua nan a haña konosementu básiko teorétiko i tambe práktika pa por drenta e industria di hospitalidat. Ta trata di 23 asistente kòki, 8 asistente bartènder/weiter, 5 bellmen/hosts i 21 kamarera. Durante un seremonia ameno, sr. Franklin Sluis, Kabinetschef Ministerio di Desaroyo Ekonómiko na nòmber di Minister Charles Cooper, huntu ku Ofisina di Turismo di Kòrsou (CTB) a hasi entrega di sertifikado na e partisipantenan.
E kursonan di asistente kòki i asistente bartènder/weiter tabatin un durashon di 12 siman. Durante e kurso di asistente kòki, a trata e téknikanan básiko di preparashon di kuminda. E kursistanan ku a sigui e kurso di asistente bartènder/weiter, a siña entre otro e téknikanan di bartènder, tuma i sirbi pedido i kon pa duna servisio di kalidat. Ademas e kursistanan aki tur a kompletá un Personal Empowerment training dirigí riba desaroyo di nan abilidatnan interpersonal.
Tambe a tuma lugá e kurso di kamarera (housekeeping). E kuríkulo di e kurso a inkluí entre otro aspektonan di seguridat, higiena, limpiesa, mantenshon diario, téknikanan di drecha kama i idioma. E partisipantenan na e kurso di bellman/host a siña tur e aspektonan importante den e kontakto ku e turista; entre otro, saludá e turista, resolvé problemanan, komunikashon efektivo i sigurá un eksperensia agradabel pa e turista. Ademas, tur partisipante a haña un seshon di informashon di SOAW tokante e derechonan i obligashonnan di e empleado i e doño di trabou. Mayoria partisipante ya ta trahando na un kompania (leerbedrijf) den industria di hospitalidat pa un periodo di 5 luna i ta risibí un salario. Despues di e 5 lunanan, e kompania tin e posibilidat pa ofresé e partisipante un kontrato di trabou basá riba su prestashon.
E programa di training ta resortá bou di Ministerio di Desaroyo Ekonómiko (MEO) i Ofisina di Turismo di Kòrsou (CTB) ta responsabel pa su implementashon. E programa ta keda ehekutá den estrecho kolaborashon ku Ministerio di Labor (SOAW), Ministerio di Enseñansa (OWCS) i partnernan den sektor privá.
