American Airlines lo inisiá servisio semanal for di Chicago entrante desèmber 2025
WILLEMSTAD- 1 di mei 2025 – Ofisina di Turismo di Korsou (CTB) den kolaborashon ku Curaçao Airport Partners (CAP), Curaçao Hospitality & Tourism Association (CHATA) i Curaçao Airport Holding (CAH) ta anunsiá ku orguyo lansamentu di un buelo semanal nònstòp nobo di American Ailines entre Chicago O’Hare International Airport (ORD) i Curaçao International Airport (CUR) entrante 6 di desèmber 2025. E buelo lo keda operá riba tur djasabra, dunando biaheronan for di e área Midwest akseso direkto na Kòrsou su kultura vibrante, playanan bunita i klima perfekto.
E buelo semanal nònstòp nobo di American Airlines, ta solamente un di e vários desaroyonan positivo ku Kòrsou ta eksperensiando. Despues di a sera 2024 ku un rèkòrt den kantidat di turista di estadia, ku konfiansa Kòrsou ta drenta den spotlight. Konforme e rapòrt di ‘Google Flights’ Summer Travel Trends’ pa aña 2025, Kòrsou ta e destinashon internashonal di mas popular pa e temporada aki. Kual ta indiká un oumento di interes di parti di biaheronan Merikano. Miéntras Kòrsou ta sigui krese, ta trahando proaktivamente riba futuro ku un kompromiso firme pa sostenibilidat. Den kolaborashon ku Sustainable Travel International, Kòrsou a inisiá un Destination Carrying Capacity Study pa evaluá e impakto ekonómiko, medioambiental i sosial di turismo. E meta ta pa sigurá ku e kresementu ta na bienestar di komunidat miéntras ku ta protehá e ekosistema i herensia kultural di nos pais poniendo prioridat na biahe di balor haltu, impakto abou. Ku e estudio aki, Kòrsou ta pone un stèndert nobo pa turismo responsabel den Karibe.
Pasaheronan ku tin deseo pa eksperensiá Kòrsou su bunitesa por kuminsá book nan buelo entrante 5 di mei próksimo. E fasilidat di e buelo nònstòp entre Chicago i Kòrsou no solamente lo benefisiá e merkado merikano pero ta nifiká tambe un destinashon di vakashon nobo i interesante pa pueblo di Kòrsou.
