WILLEMSTAD- 7 di yüni 2022 – Resientemente Ofisina di Turismo di Kòrsou (CTB) a hasi entrega di material di futbòl na 3 klup deportivo hubenil. Ta trata aki di materialnan ku a keda usá durante e klínika di futbòl ku a keda duná resientemente pa Ajax na 400 hóben aki na Kòrsou. E klupnan a risibí materialnan nobo tambe manera shùrt di Ajax i tambe bòter di awa pa deportista. Tambe a repartí bou di e klupnan bala i peon ku a keda usá durante di e klínika di futbòl. E siguiente klupnan a keda skohé pa risibí e materialnan; ta trata di: Union Deportivo Bandabou (Undeba) na Soto, Sport Vereniging Hubentut Fortuna i Centro Hubenil Mahuma. CTB ta sumamente kontentu di por a hasi e gesto aki na e hóbennan i ta sigur ku e hóbennan lo bai hasi bon uso di e materialnan deportivo ku nan a risibí.
