WILLEMSTAD- 3 di sèptèmber 2018 – Resientemente Ofisina di Turismo di Kòrsou (CTB) a organisá un agasaho pa e artista di Aruba, Jonathan Thiel mihó konosí komo Jeon ku ta kresiendo den popularidat internashonalmente. Jeon ya ta un artista konosí i hopi gustá pa algun aña kaba aki na Kòrsou. Jeon a hasi un kolaborashon ku e artista internashonal kolombiano J Balvin i kantante brasilero Anitta i a manda un saludo pa e islanan ABC den nos lenga papiamentu den e kansion ‘Machika’ ku a bira éksito number 1 riba diferente tòp mundial.
CTB a tuma e oportunidat durante Jeon su bishita na Kòrsou pa dun’e un rekonosementu pa su éksito i mustr’e ku nos ta apresiá ku el a menshoná Kòrsou den e kantika Machika. Durante e agasaho Jeon a topa ku e tim di CTB i sigur tabata un ambiente agradabel pa kompartí ku e hóben artista. CTB ta deseá Jeon tur klase di éksito den su karera musikal.
