WILLEMSTAD- 19 di febrüari 2026 – Ofisina di Turismo di Kòrsou (CTB) huntu ku diferente hotèl i 4 empresario lokal, a partisipá na e promé edishon di Vakantie Festival kual a tuma lugá na Brabanthallen, ‘s Hertogenbosch. Kòrsou tabatin e stènt di mas grandi, kaminda durante 3 dia, e tim a laga e bishitantenan eksperensiá e produkto turístiko amplio i di kalidat haltu ku Kòrsou ta ofresé. Hotèlnan a ofresé ofertanan atraktivo miéntras empresarionan lokal a presentá i bende un variedat di produkto outéntiko trahá lokalmente, entre otro, hoya den forma di pais Kòrsou, zetanan natural i obranan di arte outéntiko. Tambe e bishitantenan di e festival tabatin e oportunidat pa saka potrèt na un imágen grandi di Kòrsou su tim nashonal di futbòl, Blue Wave, esaki a duna un toke interaktivo i memorabel na e totalidat.
Total e festival a konta ku un kantidat di riba 16 mil bishitante. Esaki ta promé biaha ku Kòrsou a partisipá na un evento asina grandi den e distrito di Brabant. Na 2025, Kòrsou a risibí riba 34 mil turista for di e distrito di Brabant kual tabata un kresementu di 5% kompará ku 2024. Banda di bishitá e stèntnan, e bishitantenan di e festival por a disfrutá di diferente aktividat, área pa mucha i entretenementu musikal, kual a inkluí un DJ di Kòrsou i presentashon di brass band, kompartiendo di e manera aki un tiki di nos kultura vibrante.
CTB ta gradisí tur partner ku a kontribuí na e éksito di Kòrsou su partisipashon na Vakantie Festival: Scuba Lodge @ Sea & Scuba Lodge @ Lagun, Acoya Curaçao Resort, Villas & Spa, Renaissance Wind Creek Curaçao, Boutique Hotel ‘t Klooster & BOHO, Morena Eco Resort, Quints Travellers Inn, Courtyard by Marriott, Landhuis Chobolobo / Senior & Co., Concept Statement, Onicoco, SoliArt i Nimias Oil.
