WILLEMSTAD – 13 di febrüari 2026 –Ofisina di Turismo di Kòrsou (CTB) ta raporta kresementu kontinuo den kantidat di turista di estadia na luna di yanüari 2026, influensiá pa demanda for di tur e merkadonan prinsipal. Yanüari 2026 a registrá un kresementu di 8% kompará ku yanüari 2025, kual ta 6.098 turista adishonal. Total 79.387 turista di estadia a keda risibí den e promé luna di aña. E prestashon konsistente aki ta reflehá e demanda di e biahero i ta duna indikashon di un temporada di turismo vibrante, yegando na kasi 80 mil turista di estadia den un luna.
E prestashon for di region di Sur Amérika, Nort Amérika i Europa tabata positivo. Sur Amérika a registrá un kresementu di 15% den kantidat di turista. Nort Amérika a krese ku 8% i Europa a krese ku 6% kompará ku yanüari 2025. Region di Karibe a konosé un bahada di 6%. Den sifranan apsoluto, Europa a keda e merkado for di kua Kòrsou a risibí mas tantu turista registrando un total di 28.922 turista di estadia, siguí pa Nort Amérika ku 25.651 i Sur Amérika ku 21.053 turista di estadia. Informashon kolektá for di e karchinan di Imigrashon ta mustra ku turistanan a keda un averahe di 9.4 anochi riba nos pais na luna di yanüari kual ta 4% kresementu kompará ku yanüari 2025.
Prestashon tòp 3 merkadonan na luna di yanüari 2026
Hulanda: Kòrsou a risibí 24.443 turista for di Hulanda na yanüari 2026, reflehando un oumento di 6% kompará ku e 23.109 risibí na yanüari 2025. Mayoria turista hulandes (59%) a opta pa un otro opshon di akomodashon ku no ta resort, miéntras 41% a skohe pa keda na un resort hotel. Turistanan hulandes a keda un promedio di 13.7 anochi durante nan bishita.
Estádos Unídos: Estádos Unídos ta sigui ta un merkado importante pa Kòrsou, registrando 2% kresementu den kantidat di turista, yegando na 18.069 bishitante na yanüari 2026. Mayoria turista merikano (63%) a skohe pa keda den resort hotels, miéntras 37% a opta pa otro opshon di akomodashon. Turistanan prosedente di Estádos Unídos a keda un promedio di 6.4 anochi na Kòrsou.
Canada: Turistanan prosedente di Canada a subi ku 26% na yanüari 2026, yegando na un total di 7.582 turista kompará ku 6.006 na yanüari 2025. Bishitantenan prosedente di Canada a pasa un promedio di 11 anochi na Kòrsou, di e total di bishitantenan for di Canada, 50% a skohe pa keda den resort hotels.
Puntonan ku a resaltá na yanüari 2026
Kòrsou su industria di turismo a mustra un prestashon stabil den e promé luna di 2026, reflehando interes kontinuo pa Kòrsou. E resultadonan ta demostrá e esfuersonan kontinuo pa guia kresementu di turismo di un manera balansá. Ilustrando Kòrsou su eksperensianan úniko, kual ta sigui inspirá biaheronan rònt mundu pa bin “Feel it for yourself.” (sintié pa bo mes). Kòrsou a registrá un kantidat di 79.387 turista di estadia, 3.720 day-trippers i 128.825 turista krusero, yegando na un total di 211.932 turista pa yanüari 2026.
