WILLEMSTAD – 3 di febrüari 2026 – Ofisina di Turismo di Kòrsou (CTB), den estrecho kolaborashon ku Minister di Desaroyo Ekonómiko, sr. Roderick Middelhof i Politur, a firma un akuerdo ku Koninklijke Nederlandse Vereniging Eerste Hulp Bij Ongelukken Curaçao (Blauwe Kruis) pa asistensia médiko di emergensia na playanan. Meta di e akuerdo ta pa mehorá e tempu di reakshon den kaso di emergensia i alsa e nivel di seguridat na playanan, tantu pa turistanan komo pa e komunidat di Kòrsou. E inisiativa aki ta forma parti di un strategia mas amplio dunando prioridat na prevenshon, mas visibilidat i asistensia rápido na momentu ku mester. E akuerdo a keda firmá pa e periodo di febrüari te ku aprel 2026, kubriendo e sobrá lunanan di e temporada haltu di turismo.
