Tambe a promov’é e partido entre Alemania i Kòrsou
WILLEMSTAD – 29 di yanüari 2026 –Resientemente Ofisina di Turismo di Kòrsou (CTB) huntu ku 6 partner di sektor privá a partisipá na e feria di buseo internashonal, boot Düsseldorf 2026. Ta trata aki di e feria internashonal di deportenan akuátiko di mas grandi, ku ta tuma lugá anualmente na Alemania. Meta di Kòrsou su partisipashon tabata pa presentá nos isla komo e destinashon ku e mihó sitionan pa sambuyá. Durante di e feria e tim di Kòrsou a duna entrevistanan riba Dive stage i 3 presentashon riba e Destination Seaside Stage. Tema di e presentashonnan tabata, ‘Konosé bo oponente’, di un manera dibertido i interaktivo a hasi komparashon entre Kòrsou i Alemania ku bista riba Kopa Mundial di FIFA 2026.
Ademas, Kòrsou a finalisá den tòp 3 di e Dive Award den e kategoria ‘Mihó destinashon’, lokual ta sigui reforsá Kòrsou su posishon internashonal komo un destinashon lider den sitionan pa sambuyá. Boot Düsseldorf 2026 a konta ku partisipashon di 68 destinashon ku a bin presentá nan produkto turístiko i riba 200 mil bishitante for di 110 pais. Ademas, 1810 zjurnalista i personanan ku ta produsí kontenido digital for di 49 pais a duna reportahe di e feria via nan media òf kanal di televishon. E tim di Kòrsou tabatin un stènt den e Diving hall kaminda bishitantenan di e feria por a pasa pa tuma informashon di Kòrsou su sitionan di mas popular pa sambuyá. Banda di presentá Kòrsou komo un destinashon ideal pa sambuyá, e tim a sòru tambe pa laga e bishitantenan sinti e alegria ku klasifikashon di Kòrsou pa Mundial 2026 a trese pa Kòrsou i a promov’é tambe e partido entre Alemania i Kòrsou dia 14 di yüni próksimo.
CTB ta gradisí partnernan di sektor privá ku e aña aki a forma parti di e tim di Kòrsou durante Boot Düsseldorf 2026: Sun Reef Village on Sea, Rancho El Sobrino, Dive Division, Curaçao Divers, Central Dive Curaçao i Scuba Lodge.
