Riba 29 i 30 di sèptèmber 2025
WILLEMSTAD – 25 di ougùstùs 2025 – Ofisina di Turismo di Kòrsou (CTB) ta kontentu pa anunsiá “Shore to Ship: Elevating the Local Cruise Experience”, un simposio di dos dia dirigí riba turismo krusero ku lo tuma lugá 29 i 30 di sèptèmber próksimo. E meta ta pa trese huntu e komunidat di turismo krusero di Kòrsou, pa siña, konektá i alsa e industria. E simposio organisá den kuadro di konmemorashon di Dia Mundial di Turismo, tin komo orador prinsipal, sra. Antoinette Wright, Chief Supply Chain Officer, North America di Carnival Corporation. Tambe lo tin un pènel di eksperto i tayernan práktiko spesialmente diseñá pa trahadónan ku ta den kontakto direkto ku e turista. E tayernan lo keda dirigí pa Aquila Center for Cruise Excellence, un organisashon internashonalmente rekonosé, dediká na ofresé training den área di turismo krusero.
E simposio lo tuma lugá na The Rif at Mangrove Beach Corendon Curaçao All Inclusive, Curio by Hilton i lo start ku e orador prinsipal sra. Wright, ku lo kompartí su konosementu tokante e tendensianan den turismo krusero, e ekspektativanan di e pasahero kual ta kambia konstantemente i kon destinashonnan manera Kòrsou por keda kompetitivo. Despues lo sigui ku un pènel dinámiko ku ekspertonan di industria krusero, outoridatnan di haf, gobièrnu, kompanianan di ekskurshon i CTB. Nan lo profundisá riba e tema “From Shore to Ship – Delivering a Seamless, Authentic & Impactful Cruise Experience”. E panelistanan lo para ketu na strategianan pa fortalesé kolaborashon, mehorá satisfakshon di e bishitante i maksimalisá e impakto lokal di turismo krusero.
E simposio lo inkluí tambe tres tayer práktiko guiá pa Aquila Center for Cruise Excellence. Temanan lo inkluí Tour & Guest Experiences, Service Excellence for Frontlines i Driver Excellence. E tayernan ta diseñá pa traha riba servisio ekselente, inspirá inovashon i alsa e eksperensia total di e bishitantenan ku skohe pa bishitá Kòrsou. E tayernan ta dirigí riba trahadónan ku ta den kontakto direkto ku turista entre otro, empleadonan den tienda/pakus, atrakshonnan turístiko, operadornan di tour, shofùr di bus i di taksi. Partisipantenan ku kompletá e tayernan lo risibí un sertifikado rekonosé pa Aquila Center for Cruise Excellence.
E simposio “Shore to Ship”, ta dirigí riba invertí den futuro di turismo krusero di Kòrsou. Pa registrá, bishitá curacaotouristboard.com/shore-to-ship.
