na Chile, Uruguay i Argentina
WILLEMSTAD- 23 di yüli 2025 – Ofisina di Turismo di Kòrsou (CTB) ta kontentu pa anunsiá konklushon eksitoso di e roadshow ku a karga e nòmber ¡Solo Faltas Tú, Curaçao 2025! Ta trata di un roadshow di Kòrsou organisá pa CTB den estrecho kolaborashon ku sektor privá kaminda a bishitá Chile, Uruguay i Argentina pa asina reforsá Kòrsou su posishon komo destinashon turístiko. E roadshow a konta ku partisipashon di 427 agente di biahe i mayorista ku a sigui diferente workshop i presentashon di entre otro hotèlnan i operadornan di tour ku a forma parti di e tim di Kòrsou.
E roadshow a inisiá na Santiago de Chile ku un presentashon kombiná ku desayuno pa agentenan di biahe i mayoristanan. Despues a sigui pa Montevideo, Uruguay ku un evento similar kaminda e partisipantenan a siña konosé mas di e atributonan ku Kòrsou tin di ofresé. E eventonan aki huntu a atraé un total di 78 agente di biahe i mayorista. Despues e roadshow a kontinuá na Argentina kaminda a tene un serie di workshop i presentashon pa mayoristanan i agentenan di biahe na siudatnan Mendoza, La Plata, Buenos Aires, Rosario, Villa Maria i Córdoba. Na e aktividatnan aki a partisipá un total di 349 persona. Durante di e roadshow a lansa tambe diferente kampaña promoshonal i ofertanan pa e mayoristanan ku ta bende biahenan pa Kòrsou.
Ku e informashon atkerí, e agentenan di biahe i mayoristanan sa mas di e potensial di Kòrsou i por usa esaki pa hasi promoshon pa Kòrsou den e merkadonan di Chile, Uruguay i Argentina .CTB ta gradisí tur partner ku a forma parti di e tim di Kòrsou; Curaçao Wellness Association, Sandals Royal Curaçao, Sunscape Curaçao Resort, Spa & Casino, Dreams Curaçao Resort, Spa & Casino, Zoëtry Curaçao Resort & Spa, Kura Botanica Hotel, The Freedom Hotel, Rumba Tours, Harbor Hotel & Casino Curaçao, BC Car Rental Curaçao, Sea Aquarium Curaçao, Fiesta Tours Curaçao, Mangrove Beach Corendon Curaçao All-Inclusive Resort, Curio by Hilton, The Rit at Mangrove Beach Corendon Curaçao All Inclusive, Curio by Hilton, Livingstone Jan Thiel Beach Resort, Curaçao Marriott Beach Resort, Curaçao Vacation Tours, Irie Tours, Avianca i Copa Airlines.
