WILLEMSTAD- 23 di yüli 2025 – E aña aki ta kumpli 33 aña di Festival at Sea. Festival at Sea ta un krusero kultural prosedente di Estádos Unídos dirigí riba personanan afro amerikano. Tur aña di nobo e kompania Blue World Travel ta charter un barku krusero pa selebrashon di Festival at Sea. E aña aki e kompania a charter e barku krusero Celebrity Reflection i a bishitá entre otro Kòrsou ku un kantidat di 3000 pasahero afro amerikano. Semper ta tene bou di e pasaheronan un kolekta di buki pa mucha. Ta trata di bukinan nobo ku e pasaheronan ta kontribuí kuné komo parti di e kompania su esfuersonan pa duna bèk i nan kompromiso pa alfabetisashon. E aña aki nan a skohe Kòrsou pa risibí un total di 1000 buki ku a keda kolektá bou di nan pasaheronan.
Pa yuda fasilitá e gesto bunita aki, Ofisina di Turismo di Kòrsou (CTB) den estrecho kolaborashon ku Curaçao Ports Authority (CPA) a organisá un resepshon kaminda sra. Patricia Nicholson Yarbrough, presidente di Blue World Travel Corp. i sra. Peggy Taylor Presley di Festival at Sea a hasi entrega di e 1000 bukinan na sr. Lysandro Inacio, direktor di Biblioteka Nashonal Kòrsou i sr. Tito Ansano tambe di Biblioteka Nashonal Kòrsou. Biblioteka Nashonal Kòrsou (BNK) na su turno lo repartí e bukinan di forma gratuito durante eventonan ku nan ta organisá pa muchanan.
E bukinan ta na ingles i ta kubri un variedat di tópiko i ta dirigí riba muchanan entre 4 i 12 aña di edat. Tambe e grupo a hasi donashon di artíkulonan di skol. Pa hasi e selebrashon mas ameno, CTB a sòru pa músika di e hóben guitarista Quency Wilson, konosí komo ‘Quency The Guitar Man’.
CTB ta gradisí, CPA pa e sosten den kordinashon di e evento, Duana ku a asistí ku e parti di inklaring di e materialnan i BNK, ku ta responsabel pa distribushon di e materialnan risibí.
