Apertura ofisial Área di Rekreashon Marie Pampoen fase 3

July 13, 2023

WILLEMSTAD- 12 di yüli 2023 – Den un ambiente ameno a tuma lugá apertura ofisial di Área di Rekreashon Marie Pampoen fase 3. E desaroyo realisá na e área ta forma parti di un plan maestro pa krea un área di rekreo ku aktividatnan ekonómiko na benefisio di komunidat di Kòrsou. Na mes momentu, e área ta fungi komo un produkto turístiko. Apertura ofisial di e área tabata na enkargo di Minister di Desaroyo Ekonómiko, sr. Ruisandro Cijntje, Minister Presidènt, sr. Gilmar Pisas enkargá alabes ku e kartera di Medio Ambiente i Naturalesa, Minister di Tráfiko, Transporte i Planifikashon Urbano, sr. Charles Cooper, tambe tabata presente Minister Ornelio Martina i Minister Sithree van Heydoorn. Fase 3 ta inkluí: un área di playa ku 9 palapa, sitio pa mucha hunga, área pa fitness den airu liber inkluso pa hende ku desabilidat, área pa piknik, skatepark, vèlt pa beach volley, 4 kiosko pa aktividat komersial, un edifisio pa tualèt i diferente banki i mesa. Ademas a drecha i amplia e área pa kana i kore ku tabata eksistí kaba i e asera na Dr. Martin Luther King Boulevard. Tambe a konstruí diferente “pad” nobo, pone landscaping, instalá diferente tipo di lus i a realisá instalashon pa awa, lus i riolering.

Área di Rekreashon Marie Pampoen ya ta sumamente bon usá pa diferente grupo den nos komunidat i tambe turistanan. Fase 1 i 2 a resultá den konstrukshon di diferente fasilidat na parti Wèst di e área i e kompleho deportivo. Mas aleu, komo parti di fase 3 ta trahando aktualmente riba fortifikashon di e kosta ku lo inkluí trapinan ku ta hasi posibel pa drenta den laman i sinta na kosta. Tambe ta hasiendo e preparashonnan pa inkluí un edifisio adishonal pa tualèt.

E proyekto ta finansiá for di fondonan ku a keda fasilitá pa Ministerio pa Desaroyo Ekonómiko (MEO). Kordinashon di e proyekto ta den man di CTB miéntras Heren2 Caribbean ta supervisá e konstrukshon. Partnernan envolví ta Ministerio di Tráfiko, Transporte i Planifikashon Urbano (VVRP) i Ministerio di Salubridat, Medio Ambiente i Naturalesa (GMN). E trabounan di konstrukshon di fase 3 a keda ehekutá pa Curaçaose Wegenbouw Maatschappij B.V. (CWM).

CTB ta gradisí tur usuario di e área i spesialmente habitantenan di bario di Marie Pampoen pa e komprenshon i pasenshi durante e trabounan di konstrukshon na fase 3. Na mes momentu ta spera di por sigui konta riba esaki. Gobièrnu di Kòrsou i CTB ta hasi un apelashon na pueblo di Kòrsou pa ban sigui kuida e área i tené esaki limpi.

Most recent