sr. Robert Glick a bishitá Kòrsou pa di 29 biaha

January 17, 2023

WILLEMSTAD – 16 di yanüari 2023 – E aña aki sr. Robert Glick a kumpli 29 aña bishitando nos dushi pais Kòrsou. E ta prosedente di Merka i e biaha aki tei pa 2 siman. For di añanan 90 e ta skohe fielmente pa tur aña pasa su vakashon aki na Kòrsou. Pa e okashon spesial aki sr. Glick a risibí un bishita di Minister di Desaroyo Ekonómiko, sr. Ruisandro Cijntje na Renaissance Curaçao Resort kual ta e hotèl kaminda semper sr. Glick ta keda e último añanan.

Minister Cijntje a hiba un kombersashon ku sr. Glick pa tende kon e ta eksperensiá nos pais, kiko ta loke mas e gusta i pa gradisié pa tur e añanan ku e ta bishitando Kòrsou. Na mes momentu minister a ekstendé un invitashon na sr. Glick pa e sigui bini nos pais. Sr. Glick a indiká ku e loke mas e gusta ta nos hendenan ku ta masha kaluroso i servisial. Banda di esei e ta gusta nos naturalesa i bishitá nos playanan. Sr. Glick ta sigur un embahador pa nos pais. Na nòmber di Ofisina di Turismo di Kòrsou (CTB), Minister Cijntje den kompania di representantenan di Renaissance Curaçao Resort a entregá sr. Glick un bunita kuadro di un potrèt saká di e bista di ariba di Punda i Otrobanda.  

Most recent