Kantidat di turista di estadia risibí na Kòrsou serka di alkansá un ‘milestone’ den 2022

December 16, 2022

WILLEMSTAD – 16 di desèmber 2022 – Ofisina di Turismo di Kòrsou (CTB) ta raportá ku Kòrsou a risibí un total di 444.634 turista di estadia entre yanüari i novèmber. Na 2021 e kantidat registrá durante e mesun periodo tabata 222.723 miéntras na 2019 esaki tabata 419.125. Ora kompará e prestashon di e aña aki ku e kantidat realisá na aña pasá i na 2019 kual ta e aña ku nos ta kompará e prestashon di turismo aktual kuné (benchmark) por papia di un kresementu di respektivamente 100% i 6%. CTB por konfirmá na e momentunan aki ku gran satisfakshon ku Kòrsou lo alkansá un kantidat rèkòrt di turista di estadia na final di 2022. Sifranan ku CTB a raportá anteriormente tabata un kantidat di 467.538 na 2015 i 463.684 na 2019.

Prestashon novèmber 2022

CTB ta raportá un kantidat di 44.058 turista di estadia pa luna di novèmber. Ku e kantidat aki, luna di novèmber 2022 a alkansá 115% di e prestashon realisá na novèmber 2019 esta promé ku Pandemia. Na e momento ei un kantidat di 38.159 turista di estadia a bishitá Kòrsou. Novèmber 2022 ta te na e momentunan aki e di 3 luna ku mihó prestashon. Otro lunanan tambe ku a registrá un mihó prestashon ta luna di yüli na momentu ku nos a risibí 48.246 turista di estadia i òktober kaminda un kantidat di 44.914 turista a keda registrá.

Kòrsou ta sigui konta ku un tremendo prestashon di e merkadonan prinsipal esta; Hulanda, Estádos Unídos, Colombia i Canada. E 4 merkadonan aki huntu ta responsabel pa 75% di tur turista di estadia ku a bishitá Kòrsou durante novèmber 2022. E repartishon entre e 4 merkadonan prinsipal ta di e siguiente manera: Hulanda 42.5%, Estádos Unídos 21.3%, Colombia 5.6% i Canada 5.3%. Un kantidat di 60% di tur e turistanan ku a bishitá Kòrsou a skohe un ‘resort hotel’ (esta hotèl grandi, chikí i bùngalo) komo akomodashon. Miéntras 40% a keda den un akomodashon alternativo. Un kantidat di 39% di e turistanan ku a biaha pa Kòrsou na luna di novèmber tin entre 25 pa 44 aña di edat. Bishitantenan entre 45 i 64 aña ta representá 32% di tur turista ku a biaha pa Kòrsou. Un averahe di 8.9 anochi pa bishitante a keda registrá na luna di novèmber.

Europa ta keda e region mas fuerte pa Kòrsou. Na novèmber, un kantidat di 22.538 turista di estadia a bishitá Kòrsou for di Europa. Esaki ta 51.2% di e kantidat total di turista di estadia ku a bishitá nos pais. For di Hulanda un kantidat di 18.715 turista a keda risibí, esaki ta 111% rekuperashon kompará ku e kantidat di turista risibí na novèmber 2019 na momentu ku 16.787 turista Hulandes a keda risibí. Otro merkadonan sekundario den region di Europa tambe a presta bon. Un kantidat di 1.389 turista di estadia a keda risibí for di Alemania i 635 for di Bèlgika.

For di e region di Nort Amérika un kantidat di 11.704 turista a bishitá Kòrsou na novèmber representando 26.6% di e kantidat total di turista di estadia. Di e kantidat aki, un total di 9.369 a bini for di Estádos Unídos na novèmber 2022. Miéntras e demanda fuerte for di Estádos Unídos ta kontinuá, CTB ta kontentu pa raportá un prestashon positivo for di merkado kanades. Un kantidat di 2.335 kanades a bishitá Kòrsou.

For di region di Sur Amérika un total di 5.653 turista di estadia a bishitá Kòrsou. Di e turistanan for di Sur Amérika, 2.467 esta 44% tabata prosedente di Colombia. Un total di 853 turista di estadia tabata prosedente di Brazil na novèmber 2022. For di region Karibe un total di 3.044 turista di estadia a keda risibí na novèmber. Mayoria di e turistanan aki ta prosedente di e paisnan di Karibe Hulandes.

Na luna di novèmber un total di 41 barku krusero a bishitá nos pais ku un total di 85.924 turista krusero.

Most recent