Home / Press Releases / CTB ta premirá kresementu den turismo di estadia pa e lunanan benidero

Willemstad – 9 di yüni 2021 – Durante un konferensia di prensa awe, Paul Pennicook, direktor di Ofisina di Turismo di Kòrsou (CTB) a presentá informashon aktualisá di e kantidat di turista di estadia ku a bishitá Kòrsou, e kantidat di buelonan pa Kòrsou i e inisiativanan di merkadeo di mas importante ku ta keda ehekutá na e momentunan aki den e merkadonan prinsipal pa Kòrsou. Apertura di e konferensia di prensa tabata na enkargo di Minister di Desaroyo Ekonómiko, Dr. Steven Martina kual a suprayá e importansia di e sektor di turismo pa por sigui empuhá desaroyo ekonómiko.

Turismo di estadia aña 2020

CTB ta indiká ku 2020 tabata un aña difísil komo konsekuensia di e pandemia Covid-19. Riba nivel global turismo internashonal a registrá un kaida di 74%.  Region di Karibe a konosé un kaida di 67% miéntras Kòrsou a registrá un kaida di 62%. For di momentu ku e restrikshonnan di biahe a keda eliminá na yüli 2020 Kòrsou a kuminsá registrá kresementu riba un base mensual. Pero lamentablemente pa motibu di e konseho di biahe negativo anunsiá pa Gobièrnu Hulandes na komienso di desèmber 2020 poniendo Kòrsou riba kódigo oraño, e kantidat di turista di estadia a kuminsá registrá un bahada.

Turista di estadia promé i di dos kuartal 2021

E echo ku Kòrsou a keda poné riba kódigo oraño tabatin un impakto negativo riba e kantidat di turistanan for di Hulanda pa loke ta trata e promé 4 lunanan di 2021. Sinembargo, pa motibu di e merkado di Estádos Unídos, por a mira ku tiki tiki e sifranan a kuminsá mustra mehorashon registrando 10.118 turista di estadia na luna di mart 2021. Pero na aprel 2021 a registrá un kaida kaminda un total di 3.520 turista di estadia a keda risibí. Esaki komo konsekuensia di e echo ku Kòrsou a bai den lockdown delaster siman di mart 2021 komo konsekuensia di e oumento di kasonan positivo di Covid-19 na e momentu ei.

Mei 2021

CTB ta raportá un kantidat di 8.843 turista di estadia pa luna di mei. Kòrsou a risibí 5.440 turista prosedente di Europa di kual 4.792 a bishitá nos for di Hulanda miéntras 222 a bini for di Alemania.

Na mei, 44% di turistanan prosedente for di Europa a keda den un ‘resort hotel’ (esta hotèl chikí, grandi i bùngalo). E averahe di anochi pa turistanan for di Europa tabata 13.5, miéntras na mei 2019 un averahe di 9.0 anochi a keda registrá. Esaki ta 50% kresementu den kantidat averahe di anochi. For di Estádos Unídos un kantidat di 2.232 turista a bishitá Kòrsou. E kantidat di turista for di Estádos Unídos ta moviendo den bon direkshon mirando ku awor turistanan for di tur 50 estado por bishitá Kòrsou. For di Sur Amérika un total di 350 turista a bishitá Kòrsou, 60% ta prosedente for di Colombia. For di Karibe un total di 473 turista di estadia a keda risibí. Mayoria di e turistanan aki ta prosedente di e paisnan den Reino Hulandes. Adishonalmente, pa loke ta trata e promé 7 dianan di yüni un total di 4.398 turista a keda registrá. “Despues di a pasa den un temporada basta difísil na luna di mart i aprel pa motibu di e situashon di Covid-19 den nos merkado prinsipal esta Hulanda i aki na Kòrsou, ta bon pa mira ku e kantidat di turista a kuminsá oumentá atrobe. E temporada di zomer ta mustra prometedor”, asina Paul Pennicook a remarká.

Konektividat buelonan pa Kòrsou

CTB a kompartí un skema di buelo aktualisá pa e lunanan benidero. E skema ta kontené oumento di frekuensia di buelonan i rutanan nobo pa Kòrsou. E skema nobo aki lo alsa e potensial di kresementu den kantidat di turista di estadia pa e lunanan benidero i sobrá di 2021.

Oumento den frekuensia di buelo i skema di buelo aktual

Entrante yüli, KLM i TUI lo oumentá nan frekuensia di buelo for di Amsterdam pa Kòrsou. KLM lo oumentá su buelonan diario pa 2 biaha pa dia miéntras TUI lo oumentá di 5 pa 12 buelo pa siman. For di Nort Amérika, American Airlines tin buelonan diario prosedente di Miami i for di Charlotte 1 buelo pa siman. Ademas jetBlue tin 3 buelo pa siman for di New York. Avianca tin 2 buelo pa siman for di Bogotá miéntras COPA a start djasabra último ku 2 buelo pa siman for di Panama. Na yüli, COPA lo oumentá nan frekuensia di buelo pa 4 biaha pa siman. Wingo tambe lo start bèk ku 2 buelo pa siman for di Bogotá na yüli próksimo. Pa loke ta trata área di Karibe, Divi Divi Air, EZ Air, Winair, Air Century, Sky High, AirCaribe i Jetair Caribbean ta operá buelonan pa diferente destinashon den e region aki.

Buelonan nobo pa Kòrsou

Entrante yüli, Air Belgium lo start ku 2 buelo pa siman for di Bèlgika pa Kòrsou via Martinique. Miéntras LukeAir lo introdusí buelonan semanal for di Polonia. Adishonalmente, Jetair Caribbean lo introdusí buelonan direkto pa i for di Kingston, Jamaica entrante yüli 2021

Mas aleu a duna un bista di e inisiativanan di merkadeo pa e merkado di Hulanda, Estádos Unídos i Bèlgika.

The CTB and Air Belgium organize week of training for Belgian Tour Operators and Travel Agents
CTB projects positive growth in tourism arrivals for the upcoming months