WILLEMSTAD- 2 sèptèmber 2015 – Tabata resientemente ku ‘Sophisticated Ladies & Cultured Men’s Club Trinidad Group’ a bishitá Kòrsou. Ta trata aki di un grupo di 30 persona ku ta biaha huntu pa diferente destinashon; e biaha aki a skohe Kòrsou komo e destinashon pa un fin di siman di goso. Na aeropuerto nan a wòrdu risibí dor di Scooby’s Tours i Ofisina di Turismo di Kòrsou (CTB) ku a prepará un tremendo ‘Bon Bini’ pa e grupo, esaki a inkluí un saludo spesial ku ambiente kultural.
E resiente promoshon pa Kòrsou na Trinidad tabata plataforma ideal pa bolbe posishoná nos isla komo un destinashon na unda ku gruponan manera ‘Sophisticated Ladies & Cultured Men’s Club Trinidad Group’ por fásilmente sosialisá i disfrutá di diferente aktividatnan den grupo. Kòrsou tin hopi atrakshon pa ‘group vacationers’. CTB huntu ku partnernan; Sunscape Curaçao Resort, Spa & Casino, Pelican Boat Trips a brinda e grupo for di Trinidad un fin di siman alegre kargá ku aktividatnan turístiko i paseo di kompra.
