A presentá Kòrsou komo destinashon faborito den Karibe

…18 agente di biahe a asistí na e presentashon…
WILLEMSTAD- 6 di ougùstùs 2015 – Resientemente Ofisina di Turismo di Kòrsou (CTB) a tene un presentashon edukativo pa Top Vacations i diferente agente di biahe komo parti di un kampaña den zùit di Florida. Insel Air, Hilton Curaçao i Santa Barbara Beach & Golf Resort a djòin CTB durante di e presentashon kaminda a duna informashon detayá di e produkto ku e destinashon Kòrsou tin di ofresé, e diferente aerolínea i hotèlnan. A presentá tambe paketenan atraktivo di hotèl ku ta benefisiá e biahero hispániko. E presentashon ta forma parti di un kampaña promoshonal dirigí riba e konsumidó hispániko. Na e presentashon a asistí 18 agente di biahe entusiasmá pa siña mas di Kòrsou i sera konosí ku maneranan atraktivo pa bende Kòrsou komo produkto turístiko na nan klientenan.