WILLEMSTAD – 9 di novèmber 2026 –Ofisina di Turismo di Kòrsou (CTB) ta invitá habitantenan di Kòrsou pa partisipá den e Enkuesta di Kalidat di Bida di Residente, ku ta tuma lugá di 10 te ku 30 di novèmber 2026. E enkuesta ta puntra habitantenan kon nan ta eksperensiá turismo, kon e ta afektá nan kalidat di bida i si e benefisionan di turismo ta yega na habitantenan na un manera ku nan por probechá di dje. Aktualmente, CTB ta preparando su Plan Maestro Stratégiko di Turismo pa 2027 – 2031, ku lo sirbi komo guia pa desaroyo di turismo riba Kòrsou durante e próksimo sinku añanan. Pa garantisá ku e plan ta reflehá e personanan ku ta biba na Kòrsou, CTB ke skucha direktamente di komunidat lokal.
Kon pa partisipá
Habitantenan por yena e enkuesta na tres manera:
- Online: bishitá curacaotouristboard.com/survey pa e link di e enkuesta i mas informashon detayá tokante e enkuesta. E link di e enkuesta ta disponibel tambe riba e páginanan korporativo di medio sosial di CTB [Curacao Tourist Board].
- Via kódigo QR: Dor di skèn e kódigo QR ku ta aparesé den e anunsionan di CTB den korantnan lokal.
- Personalmente: Enkuestadónan di CTB lo hasi entrevista na diferente lugá ku habitantenan ta bishitá regularmente, pa asina por alkansá un grupo amplio di habitante di tur parti di Kòrsou. E enkuestadónan di CTB lo bisti T-shirt i badge di CTB, pa nan ta rekonosibel fásilmente. Habitantenan ku keda aserká por pidi pa mira e karchi di identifikashon di e enkuestadó.
Informashon tokante e enkuesta
- Periodo di e enkuesta: 10 te ku 30 di novèmber 2026
- Durashon: Aproksimadamente 10 minüt
- Partisipashon boluntario: Partisipashon ta kompletamente boluntario.
- Konfidensial: Tur kontesta ta konfidensial i ta keda presentá solamente den forma kombiná, di manera ku no ta posibel pa identifiká ningun persona individualmente.
- Sorteo di premio: Habitantenan ku kompletá e enkuesta i duna nan datonan di kontakto na final di e enkuesta, lo partisipá den un sorteo ku oportunidat pa gana un di e sinku premionan
Turismo ta parti di bida diario na Kòrsou, i ta habitantenan ta esnan ku ta eksperensiá su efektonan di manera mas direkto. Kada kontesta ta yuda CTB pa desaroyá un strategia di turismo ku ta benefisiá no solamente esnan ku bin bishitá Kòrsou, pero tambe e pueblo di Kòrsou. CTB ta stimulá tur habitante pa partisipá, pa asina e resultadonan reflehá e imágen kompletu di kon turismo ta toka bida diario na Kòrsou.
