WILLEMSTAD- 12 di òktober 2026 – Ofisina di Turismo di Kòrsou (CTB) resientemente a organisá un evento pa 50 mayorista i representantenan di medionan di komunikashon na Argentina pa di forma ofisial presentá e ruta direkto di Aerolíneas Argentinas pa Kòrsou ku lo inisiá entrante yanüari 2027. E evento a inkluí spich di sr. Mauritz Verheijden, Embahador di Reino Hulandes na Argentina, sr. Matías Leonetti, Direktor di Benta na Aerolíneas Argentinas i sr. Hugo Clarinda, direktor athunto di CTB.
Durante di e evento, e tim di CTB a duna un presentashon den kua a resaltá e diversidat di produkto turístiko ku Kòrsou tin di ofresé, brindando esnan presente informashon balioso tokante e destinashon. E invitadonan a disfrutá tambe di un seshon di networking i un rifa di premio, akompañá pa un presentashon musikal di artista lokal Juni Juliet, ku a entretené e presentenan ku kantikanan tradishonal di Kòrsou. Na e evento, CTB a keda kompañá pa Curaçao Airport Holding i representantenan di diferente hotèl i operador di tour na Kòrsou. E hotèlnan i operadornan di tour partisipante a haña tambe e oportunidat pa presentá nan respektivo produkto i servisio na esnan presente.
Pa medio di inisiativanan manera e evento aki, CTB tin komo meta pa sigurá ku partnernan komersial den industria di biahe i representantenan di medionan di komunikashon na Argentina ta bon informá tokante e buelo direkto nobo pa Kòrsou i e diversidat di produkto turístiko ku Kòrsou ta ofresé.
