WILLEMSTAD – 13 di yanüari 2026 –Ofisina di Turismo di Kòrsou (CTB) ta kontentu pa raportá kresementu kontinuo den prestashon di turismo. Nos destinashon a risibí 788.427 turista di estadia na 2025. E prestashon aki ta ilustrá e interes kresiente pa Kòrsou su kultura vibrante, paisahenan i hospitalidat kaluroso. E logro aki lo no tabata posibel sin e sosten kontinuo di tur partner stakeholders, komunidat i sigur nos bishitantenan balioso. Kompará ku 2024, Kòrsou a registrá un kresementu sólido di 13% ku un kantidat adishonal di 88.185turista di estadia.
Kòrsou su industria di turismo a demostrá kresementu kontinuo durante 2025 impulsá pa inisiativanan stratégiko pa mantené visibilidat den e merkadonan prinsipal. E esfuersonan aki di forma eksitoso a reforsá Kòrsou su posishon komo un destinashon kaminda turistanan por realmente bin “Feel it for yourself” (sintié pa bo mes). Di yanüari pa desèmber 2025, Kòrsou a risibí 788.427 turista di estadia, 44.243 day-trippers i 881.665 turista krusero, resultando den un total di 1.714.335 bishitante pa 2025. Esaki ta representá un kresementu di 9% den e total di turistanan risibí kompará ku 2024, enfatisando kresementu kompletu di Kòrsou komo destinashon. Informashon kolektá for di e karchinan di Imigrashon ta mustra ku durante 2025 turistanan a keda un averahe di 8.4 anochi riba Kòrsou i mas ku mitar (56%) a skohe pa keda den resort hotels.
Desèmber 2025
Luna di desèmber 2025 ta representá otro logro den Kòrsou su éksito den turismo. Na desèmber, Kòrsou a risibí 80.891 turista di estadia surpasando e rèkòrt anterior i markando e kantidat total mensual registrá di mas haltu pa Kòrsou. Esaki ta reflehá un kresementu di 10% kompará ku desèmber 2024, demostrando kresementu kontinuo den e segmentu di estadia. E kresementu mas fuerte a keda liderá pa Hulanda, ku kresementu kontinuo tambe for di Estádos Unídos i Colombia.
Prestashon tòp 3 merkadonan na luna di desèmber 2025
Hulanda: Kòrsou a risibí 26.243 turista for di Hulanda na desèmber 2025, reflehando un oumento di 4% kompará ku desèmber 2024. Turistanan hulandes a keda un promedio di 13.7 anochi durante nan bishita. Mayoria di e turistanan aki tabata prosedente di Zuid-Holland (27%), Noord-Holland (20%) i Noord-Brabant (13%).
Estádos Unídos: For di Estádos Unídos un total di 20.423 turista di estadia a keda risibí na desèmber 2025. Esaki ta un oumento di 7% kompará ku desèmber 2024. Turistanan prosedente di Estádos Unídos a keda un promedio di 6.5 anochi riba Kòrsou. E estadonan for di kua Kòrsou a risibí mas tantu turista for di Estádos Unídos ta; New York (15%), Florida (8%) i Georgia (6%).
Colombia: Turistanan prosedente di Colombia a subi ku29% na desèmber 2025, yegando na un total di 6.902 turista kompará ku desèmber 2024. Bishitantenan prosedente di Colombia a pasa un promedio di 7 anochi na Kòrsou, mayoria tabata prosedente di Bogotá (32%) i Antioquia (24%).
