WILLEMSTAD – 26 di mart 2026 – Gerard Joling, konosido kantante hulandes i presentadó na televishon, e aña aki a kumpli 39 aña bishitando Kòrsou. For di aña 1987, sr. Joling ta bishitá Kòrsou pa presentashon di su konsiertonan i pa vakashon. Komo muestra di apresio, Minister Charles Cooper den representashon di Minister enkargá ku desaroyo ekonómiko huntu ku sra. Zulaika Mook, sectordirecteur na Ministerio di Desaroyo Ekonómiko, a hasi entregá di un plakat di rekonosementu na sr. Joling.
E loke mas sr. Joling ta gusta di Kòrsou ta ku Kòrsou ta e destinashon ideal pa relahá i tambe pa dibertí. El a indiká ku Kòrsou ta ofresé hopi posibilidat, for di playanan bunita, ideal pa bo deskansá te na un selekshon ekselente di kumindanan delisioso. Kòrsou ta e lugá perfekto pa bo por gosa di un dushi Happy Hour na final di dia. Tambe sr. Joling a ekspresá su apresio pa e gran variedat di restorantnan ku a bini aserka e último añanan. Su plato lokal faborito ta un dushi piska.
Ofisina di Turismo di Kòrsou (CTB) ta gradisí sr. Joling pa su 39 añanan di bishita na nos pais. Sr. Joling ta sigur un embahador pa nos pais.
