WILLEMSTAD – 13 di mart 2026 –Ofisina di Turismo di Kòrsou (CTB) ta raportá ku e kresementu den kantidat di turista di estadia a sigui fuerte na febrüari 2026, influensiá pa demanda sólido for di tur e merkadonan prinsipal. Kòrsou a registrá un kresementu di 7% kompará ku febrüari 2025, kual ta 4.984turista adishonal. Total 74.591turista di estadia a keda risibí durante e di dos luna di aña, reflehando e interes kontinuo pa bishitá Kòrsou durante e periodo di wenter.
Demanda for di e regionnan prinsipal pa Kòrsou a sigui positivamente. Sur Amérika a registrá e kresementu di mas fuerte, ku 27% kresementu kompará ku febrüari 2025, miéntras Nort Amérika a krese ku 6% i Europa a krese ku 3%. Region di Karibe a risibí ménos turista na febrüari 2026. Den sifranan apsoluto, Europa a keda e merkado for di kua Kòrsou a risibí mas tantu turista registrando un total di 27.799 turista di estadia, siguí pa Nort Amérika ku 27.042 i Sur Amérika ku 16.206 turista di estadia. Informashon kolektá for di e karchinan di Imigrashon ta mustra ku turistanan a keda un averahe di 8.6 anochi riba nos pais na luna di febrüari.
Prestashon tòp 3 merkadonan na luna di febrüari2026
Hulanda: Kòrsou a risibí 23.460 turista for di Hulanda, reflehando un oumento di 2% kompará ku 22.969 risibí na febrüari 2025, reflehando un interes kontinuo pa nos pais. Mayoria turista hulandes (55%) a opta pa un otro opshon di akomodashon ku no ta resort, miéntras 45% a skohe pa un resort hotel. Turistanan hulandes a keda un promedio di 11.8 anochi durante nan bishita.
Estádos Unídos: Estádos Unídos ta sigui ta un merkado importante pa Kòrsou, registrando 19.622 bishitante na febrüari 2026. Mayoria turista merikano (64%) a skohe pa resort hotels, miéntras 36% a opta pa otro opshon di akomodashon. Turistanan prosedente di Estádos Unídos a keda un promedio di 6.1 anochi na Kòrsou.
Canada: Turistanan prosedente di Canada a subi ku 25% na febrüari 2026, yegando na un total di 7.420 turista kompará ku 5.917 na febrüari 2025, esaki ta reflehá e interes kresiente di bishitantenan for di Canada. Bishitantenan prosedente di Canada a pasa un promedio di 9.4 anochi na Kòrsou, di e total di bishitantenan for di Canada, 50% a skohe pa keda den resort hotels.
Puntonan ku a resaltá na febrüari2026
Kòrsou su industria di turismo a mustra un prestashon sólido na febrüari 2026, komo resultado di demanda stabil durante periodo di wenter i e interes kontinuo for di e merkadonan prinsipal. E sifranan di luna di febrüari ta reflehá un kombinashon balansá entre e diferente merkadonan i interes kontinuo di bishitantenan, resultando den un promedio di 8.6 anochi pa turista. E resultadonan aki ta aliniá ku e esfuersonan kontinuo pa fortalesé un ekonomia di bishitantenan balansá i di kalidat haltu, miéntras ta sigui eksponé e momentunan ku ta inspirá bishitantenan pa konektá ku Kòrsou i berdaderamente “Feel it for yourself.” (sintié pa bo mes).
