WILLEMSTAD – 11 di mart 2026 – Un tim di Kòrsou konsistiendo di representantenan di Ofisina di Turismo di Kòrsou (CTB) i 10 partner di sektor privá a partisipá siman pasá na ITB Berlin na Alemania. Ta trata aki di un di e ferianan turístiko dirigí riba komersio di mas grandi mundialmente. E aña aki a marka e di 60 aniversario di ITB ku partisipashon di riba 5 mil ekshibidor for di 166 pais i aproksimadamente 97 mil partisipante. Meta di Kòrsou su partisipashon tabata pa estrechá lasonan komersial ku partnernan internashonal. Durante di e feria di 3 dia, e tim di Kòrsou a reuní ku entre otro operadornan di tour, aerolíneanan, agensianan di biahe online i prensa dirigí riba komersio.
E biaha aki, Kòrsou tabatin un stènt kolorido di 100m2 ubiká den e Caribbean Hall. Durante e dianan di e feria e tim di Kòrsou a sostené diferente reunion ku partnernan internashonal pa di un forma stratégiko elaborá riba e akshonnan i inisiativanan stipulá pa 2026.
Ku bista riba e partido di Kòrsou kontra Alemania dia 14 di yüni próksimo den kuadro di Kopa Mundial di FIFA 2026, CTB a ekstendé un invitashon na invitadonan pa un partido di futbòl di mesa. Esakinan tabata tuma lugá na momentu ku nan tabata wardando pa nan reunion start. Dona Regis-Prosper, Sekretario General i CEO di Caribbean Tourism Organization (CTO) tambe a pasa na e stènt di Kòrsou i a hunga un partido di futbòl di mesa kontra Muryad de Bruin, direktor di CTB.
Un danki ta bai na e partnernan di sektor privá ku a forma parti di e tim di Kòrsou durante ITB 2026; Coral Estate Luxury Resort, Curaçao Marriott Beach Resort, Renaissance Wind Creek Curaçao Resort, FBTT, Acoya Curaçao Resort, Villas & Spa, Corendon Hotels & Resorts, The Kontiki Curaçao Beach Resort, Courtyard by Marriott Curaçao, Dreams Curaçao Resort, Spa & Casino i Samurai Curaçao.
