WILLEMSTAD- 23 di yanüari 2026 – Resientemente Minister di Desaroyo Ekonómiko, sr. Roderick Middelhof huntu ku Ofisina di Turismo di Kòrsou (CTB) a lansa e inisiativa pa enkurashá gruponan di marcha hubenil pa ban yuda tene e marcha di Karnaval hubenil limpi. Durante di un enkuentro ameno, e lidernan di e 20 gruponan di marcha hubenil a risibí un aporte finansiero kual lo mester sirbi pa yuda e gruponan den nan esfuersonan pa kolekta i deshasí di kùp i bòter di plèstik usá dor di nan grupo durante e marcha na un manera responsabel.
Durante e seremonia a hiba palabra Minister Middelhof, direktor di CTB, sr. Muryad de Bruin, Presidente di Asosiashon di Gruponan di Karnaval di Kòrsou (AGKK), sr. Ricardo Pita Correia i Manager di Produkto na CTB, sr. Andre Rojer. Tambe tabatei presente, parlamentario Ishair Monte, Reina, Prens i Pancho di Karnaval Hubenil 2026 i Rei di Tumba Hubenil 2026. Kada representante di e gruponan hubenil a firma e kompromiso ku nan grupo tambe ta aportá na un marcha limpi. Pa algun aña kaba CTB huntu ku Ministerio di Desaroyo Ekonómiko (MEO) a ehekutá diferente kampaña pa tene Kòrsou limpi i tambe pa stimulá resiklahe. Awor na aña 2026, a skohe pa ban yuda konsientisá riba un marcha hubenil limpi.
Ademas durante di Festival di Tumba 2026, CTB lo ta presente ku su kampaña di konsientisashon Kòrsou ta Dushi. Kaminda e enfoke lo ta pa konsientisá riba tene nos isla limpi. Pasa na e booth di Kòrsou ta Dushi pa tuma informashon i sigui e páginanan sosial di Kòrsou ta Dushi i CTB pa mas informashon riba e kampaña durante Festival di Tumba 2026 i e premionan. Huntu nos ta tene Kòrsou limpi!
