Festival di Tumba, Karnaval i diferente otro evento musikal i deportivo
WILLEMSTAD- 19 di yanüari 2026 – Resientemente Ofisina di Turismo di Kòrsou (CTB) huntu ku Asosiashon di Músiko i Artista di Kòrsou (AMAK), representantenan di Jacky Circuit / Fundashon Autosport Curaçao (FAC) i Easy Riders Curaçao a tene un media tour na Aruba. Komunidat di Aruba a kada kordialmente invitá pa bin Kòrsou pa Festival di Tumba, Karnaval i diferente evento musikal i deportivo programá pa e promé mitar di aña 2026. A pone atenshon spesial riba e klasifikashon di Kòrsou pa Kopa Mundial di FIFA 2026, invitando Aruba pa bin eksperensiá e ambiente di Blue Wave na Kòrsou durante e weganan di futbòl.
Festival di Tumba ta un evento masha gustá pa nos bishitantenan di Aruba. Jair ‘Buddy’ Vesprey di Aruba lo partisipá un bia mas ku e agrupashon Icons. Dwight Leoneta lo partisipá den Tumba 2026 komo areglista. Ademas manera a keda anunsiá pa AMAK, e popular kantante Jeon di Aruba lo duna un presentashon spesial riba e promé anochi di Festival di Tumba. E edishon di e aña aki sigur lo ta unu kargá ku ambiente.
Tambe a ekstendé un invitashon na komunidat di Aruba pa tei na e evento di Drag Race, Caribbean Pinks All Out na aprel próksimo kual lo konta ku koredornan di Hulanda, Merka, Puerto Rico i Aruba mes. Easy Riders Curaçao lo organisá su tradishonal paseo di motersaikel en konekshon ku Dia di Bandera. E aña aki Easy Riders Curaçao lo selebrá e di 27 aña di e paseo.
CTB ta yama danki na: Canal 90 FM, Hot 103.5 FM Aruba, Enfoke – 24ora.com, Magic FM Aruba, Mas FM, NoticiaCla, Power 101.7 FM, TeleAruba, Top 95 FM i XFM Aruba pa e kobertura durante e media tour i e apoyo duná na Blue Wave.
