WILLEMSTAD- 16 di yanüari 2026 – Un biaha mas Kòrsou tabata presente na Vakantiebeurs Utrecht. E aña aki, Ofisina di Turismo di Kòrsou (CTB) kompañá pa 9 partner di sektor privá a forma e tim di Kòrsou. Banda di promové Kòrsou su paisahenan bunita, kultura riku, variedat di akomodashon i atrakshonnan úniko, e biaha aki a inkluí un elemento spesial di Blue Wave den e totalidat. Den e stènt tabatin un imágen grandi di Kòrsou su tim nashonal di futbòl kampion, Blue Wave kaminda bishitantenan por a saka potrèt. Di e manera aki a laga bishitantenan sinti e alegria ku klasifikashon di Kòrsou pa Mundial 2026 a trese na Kòrsou i invitá nan mesora pa bin wak e weganan na Kòrsou.
Pa e generashon mas yòn, e aña aki a pone un área kaminda nan por a hunga diferente wega online den branding di Kòrsou. Di forma virtual e bishitante por a sinti manera e ta den un kareda di racing na Kòrsou. Ademas, partnernan a rifa diferente premio atraktivo bou di e bishitantenan di e stènt di Kòrsou.
Despues di Vakantiebeurs, CTB a organisá e workshop ‘Curaçao, Beleef de avond met mij’, spesialmente pa laga agentenan di biahe sera konosí ku Kòrsou su produkto turístiko. E workshop a konsistí di un seshon den formato di ‘speed dating’ kaminda 10 partner di Kòrsou a duna informashon di nan produkto na e agentenan di biahe. Un total di 50 agente di biahe a partisipá na e workshop. Pa duna un toke kultural na e workshop, a laga Qshans, konosido músiko yu di Kòrsou residensia na Hulanda kompartí un tiki di Kòrsou su kultura musikal. Di un forma dibertido, Qshans a kompartí informashon i tambe a laga e agentenan di biahe baila músika di Kòrsou. El a keda kompañá pa DJ BrianK tambe prosedente di Kòrsou.
CTB ta gradisí tur partner ku a forma parti di e tim: Acoya Curaçao Resort, Villas & Spa, Courtyard by Marriott, Coral Estate Luxury Resort, Curaçao Marriott Beach Resort, Dolphin Suites & Wellness Curaçao, Dreams Curaçao Resort, Spa & Casino, Harbor Hotel & Casino Curaçao, Landhuis Chobolobo, LionsDive Beach Resort Curaçao, Morena Eco Resort, Renaissance Wind Creek Curaçao, Samurai Curaçao, Scuba Lodge Lagun Beach, Scuba Lodge City Beach, The Kontiki Curaçao Beach Resort i The Rif at Mangrove Beach Corendon Curaçao All-Inclusive, Curio by Hilton.
