WILLEMSTAD – 16 di desèmber 2025 –Ofisina di Turismo di Kòrsou (CTB) ta kontentu pa raportá kresementu kontinuo den prestashon di turismo, novèmber 2025 a registrá un kresementu sólido di 9% kompará ku novèmber di aña pasá. Total 65.378 turista di estadia a bishitá nos pais na novèmber 2025.
E prestashon di tantu region di Sur Amérika, Nort Amérika, komo Europa tabata positivo. Sur Amérika a registrá un kresementu di 21%, Nort Amérika a krese ku 19% i Europa a krese ku 4% kompará ku novèmber 2024. Region di Karibe a konosé un bahada di 27%. Europa ta keda e merkado for di kua Kòrsou a risibí mas tantu turista registrando un total di 26.006 turista di estadia, siguí pa Nort Amérika ku 22.105 i Sur Amérika ku 13.596 turista di estadia. Informashon kolektá for di e karchinan di Imigrashon ta mustra ku turistanan a keda un averahe di 8.3 anochi riba nos pais na luna di novèmber.
Prestashon tòp 3 merkadonan na luna di novèmber 2025
Hulanda: Kòrsou a risibí 21.537 turista for di Hulanda na novèmber 2025, reflehando un oumento di 3% kompará ku novèmber 2024. Turistanan hulandes a keda un promedio di 11.7 anochi durante nan bishita.
Estádos Unídos: For di Estádos Unídos un total di 15.898 turista a keda risibí na novèmber 2025. Esaki ta un oumento di 8% kompará ku e mesun temporada na aña pasá. Turistanan prosedente di Estádos Unídos a keda un promedio di 5.8 anochi riba Kòrsou.
Canada: Turistanan prosedente di Canada a subi ku60% na novèmber 2025, yegando na un total di 6.207 turista kompará ku novèmber 2024. Bishitantenan prosedente di Canada a pasa un promedio di 8.1 anochi na Kòrsou.
Puntonan ku a resaltá di yanüari te ku novèmber2025
Turismo di estadia a registrá te ku luna di novèmber un kresementu di 13%, ilustrando prestashon konsistente i kresementu di Kòrsou su posishon komo un destinashon kompetitivo den region Karibe. Den sifranan apsoluto, e kresementu aki ta reflehá un total di 707.546 turista di estadia te ku novèmber 2025.
E total di resultado di turismo pa e periodo di yanüari te ku novèmber 2025 a krese ku 9% yegando na un total di 1.4 mion turista. E distribushon entre turismo di estadia, krusero i day trippers ta 47.6%, 49.7% i 2.7% respektivamente.
